Dövlət İmtahan Mərkəzi iyunun 3-də Astara rayonunda ümumi (9 illik) orta təhsil səviyyəsi üzrə buraxılış imtahanları keçirib.
AZƏRTAC-ın bölgə müxbiri xəbər verir ki, imtahanların keçirilməsi üçün Astara rayonunda 8 İmtahan mərkəzi ayrılıb. Buraxılış imtahanları Astara şəhərindəki 1, 2, 3, 5, 7 nömrəli tam orta, Pensər kənd 2 nömrəli, Motlayataq və Pəlikəş kənd tam orta məktəblərdə təşkil olunub.
Pandemiya dövrünün tələblərinə uyğun olaraq imtahan mərkəzlərində əvvəlcədən zəruri profilaktik tədbirlər görülüb, binalarda və zallarda dezinfeksiya işləri aparılıb.
İmtahana başlamazdan əvvəl binaya daxil olan iştirakçıların məsafədən ölçən elektron termometrlə hərarətləri yoxlanılıb. İştirakçılar bütün proses boyu tibbi maskadan istifadə ediblər. İmtahan otaqlarında iştirakçıların sayı sosial məsafə prinsiplərinə uyğun şəkildə tənzimlənib, imtahan heyəti müvafiq qoruyucu vasitələrlə təmin olunub.
Rayon üzrə 1436 şagirdin iştirakının nəzərdə tutulduğu imtahanların idarə olunmasına 18 imtahan rəhbəri və 139 nəzarətçi-müəllim cəlb edilib.
Şəhər 2 nömrəli tam orta məktəbində keçirilən buraxılış imtahanlarında İmtahan rəhbəri Elvin Aslanovun verdiyin məlumata əsasən, buraxılış imtahanlarında iştirakı nəzərdə tutulmuş 252 şagirddən 8 nəfəri imtahana gəlməyib.
Rayonda buraxılış imtahanları mövcud təlimata və karantin rejiminin tələblərinə uyğun şəkildə aparılıb və heç bir qanun pozuntusuna yol verilməyib.
