Mərkəzləşdirilmiş imtahanla qəbul həyata keçirilən lisey və gimnaziyalar üçün seçim prosesi 6 avqust saat 15:00-da aktivləşəcək və 13 avqust saat 12:00-da başa çatacaq.
Bu barədə Təhsil İnstitutundan məlumat verilib.
Bildirilib ki, namizədlər seçimlərini şəxsi kabinet vasitəsilə, "İmtahanlar" bölməsində yerləşən "Lisey seçimi" hissəsindən həyata keçirə bilərlər.
Əlavə araşdırmanın nəticələrinə əsasən, müvafiq komissiyanın qərarı ilə nəticələri ləğv edilən şəxslər 8 avqust saat 17:00-a qədər office@arti.edu.azelektron ünvanına rəsmi ərizə ilə müraciət edə bilərlər.
Təhsil eksperti Cahid İmanlı “Sherg.az”a bildirdi ki, lisey və gimnaziyaların üstünlükləri çoxdur:
“Burada təhsil proqramları daha dərin və geniş olur, fənlər üzrə ixtisaslaşma imkanı verilir. Məsələn ayrıca olaraq təbiət, riyaziyyat, dil yönümlü liseylər fəaliyyət göstərir. Bu məktəblərə adətən təcrübəli və yüksək ixtisaslı müəllimlər cəlb olunur, müəllimlərə daha yüksək əmək haqqı verildiyi üçün onlardan bunun müqabilində nəticə də tələb olunur. Ən əsası liseylərə qəbul imtahanla olduğu üçün bir qayda olaraq savadlı şagirdlər seçilir və belə mühitdə sağlam rəqabət və oxumaq motivasiyası da güclü olur. Daha sonra liseylərdə disiplin güclü olur, burada şagirdlərin inkişafının daimi monitorinqi keçirilir, dərsdən kənar məşgələlərlə onların inkişafına dəstək olunur, şagirdlərin dərsdən yayınma halları baş vermir. Bəzi liseylərdə beynəlxalq proqramlar da (lB, STEM və s.) keçirlir ki, bu da əlavə bir üstünlükdür. Məhz bu faktorlara görə də lisey və gimnaziya məzunlarının beynəlxalq və ölkə daxilindəki imtahanlarda göstəriciləri yüksək olur”.
