Uzunmüddətli perspektivdə Qarabağ Universitetində ingilis dilində ixtisasların açılacağı ehtimalı yüksəkdir
Növbəti tədris ilində Qarabağ Universitetində ingilis və rus bölməsi üzrə tələbə qəbulu nəzərdə tutulmur.
Bu barədə ali təhsil müəssisəsi rəsmi sosial media hesablarında məlumat yayıb.
"Ən çox ünvanlanan suallardan biri də Qarabağ Universitetində ingilis və rus bölməsi üzrə plan yerləri ilə bağlıdır. Bildirmək istəyirik ki, 2025/2026-cı tədris ilində Qarabağ Universitetində ingilis və rus bölməsi üzrə tələbə qəbulu nəzərdə tutulmur", - məlumatda qeyd olunub.
Təhsil eksperti Elçin Süleymanov “Sherg.az”a bildirdi ki, Qarabağ Universiteti ötən il ilk dəfə tələbə qəbul edərkən ingilis dilində tədris mövcud deyildi:
“Lakin hazırda universitetdə tələbələrin ingilis dili bacarıqlarının yüksəldilməsi və bəzi fənlərin ingilis dilində tədrisi istiqamətində intensiv fəaliyyətlər həyata keçirilir. Görünür ki, Qarabağ Universitetinin strateji yanaşması ondan ibarətdir ki, abituriyentlər tədrisi Azərbaycan dilində alsalar da, dil bacarıqları yüksək səviyyədə inkişaf etdirilsin və ixtisas fənləri ilə bağlı terminlər ingilis dilində mənimsədilsin. Bu kontekstdə rus dilində tədris tamamilə fərqli bir istiqamət təşkil edir. Belə ki, bu istiqamətdə tədrisin təşkil olunması üçün müvafiq pedaqoji kadr təminatı zəruridir. İngilis dilində tədris üçün isə tələbələrin qəbul zamanı Dövlət İmtahan Mərkəzinin imtahanından 100 bal üzərindən minimum 40 bal toplaması tələb olunur. Əgər bu şərtlərlə tələbə qəbulu həyata keçirilsə, abituriyentlərin seçimi müəyyən dərəcədə məhdudlaşa bilər və ya qəbul prosesi ADA Universiteti və digər beynəlxalq səviyyəli ali təhsil müəssisələrində olduğu kimi beynəlxalq (EST, SAT və s.) ballar əsasında aparılmalıdır. Yeni yaradılmış universitetin bu tipli tədris sistemini formalaşdırması müəyyən zaman tələb edir. Bununla belə, uzunmüddətli perspektivdə Qarabağ Universitetində ingilis dilində ixtisasların açılacağı ehtimalı yüksəkdir. Belə ki, ingilis dilində tədrisin həyata keçirilməsi üçün infrastruktur mövcuddur və bu istiqamətdə kadr hazırlığı davam etdirilir. Yaxın illərdə bu istiqamətdə tədrisin təşkil olunacağı gözlənilir. Hazırda isə formalaşma mərhələsində olan universitetdə tədris dili Azərbaycan dili olmaqla yanaşı, ixtisas fənlərinin müəyyən hissəsi ingilis dilində tədris olunur ki, bu da tələbələrə həm yüksək səviyyədə ingilis dili bacarıqları, həm də ixtisas bilikləri əldə etmək imkanı yaradır”.
