İcra hakmiyyəti orqanlarında səmərəliliyinin artırılması diqqət mərkəzindədir. Bu qurumların fəaliyyətində operativliyin və şəffaflığın təmini məqsədilə bir çox tədbirlər həyata keçirilir. Bu xüsusda Prezident İlham Əliyev Göygöl, Masallı və Lerik rayonuna yeni icra başçıları təyin edib.
Elvin Nazim oğlu Paşayev Göygölün, Əkbər Bəxtiyar oğlu Abbasov Lerikin, Araz Süleyman oğlu Əhmədov isə Masallı RİH başçıları vəzifələrinə təyinat alıblar.
Həmçinin Prezident İlham Əliyev Araz Əhmədovu Masallı Rayon İcra Hakimiyyətinin başçısı, Əkbər Abbasovu Lerik Rayon İcra Hakimiyyətinin başçısı və Elvin Paşayevi Göygöl Rayon İcra Hakimiyyətinin başçısı vəzifələrinə təyin olunmaları ilə əlaqədar görüş keçirib.
"Bunu mən sizə deyirəm və bütün dövlət orqanlarının nümayəndələrinə deyirəm, eyni zamanda, qanunsuz işlərlə məşğul olmaq istəyən insanlara deyirəm: Əl çəkin bundan! Cəzalandırılacaqsınız və cəzalandırılırlar. Biz kiminsə tamahına, kiminsə şəxsi maraqlarına görə ölkəmizin uğurlu inkişafına kölgə sala bilmərik.
Ona görə torpaqların qanunsuz zəbt edilməsi prosesi araşdırılmalıdır. Həm rəhbərlik edəcəyiniz rayonlarda, həm bütün ölkə üzrə, Abşeron yarımadasında, sahilboyu ərazilərdə, bütün rayonlarda araşdırılmalıdır və qanunsuz əməllərə son qoyulmalıdır", - İ.Əliyev söyləyib.
Yeni təyinatları "Sherg.az"a dəyərləndirən hüquq müdafiəçisi Novella Cəfəroğlu bildirib ki, icra başçıları millətin sözünü eşitməsə, etinasız yanaşsa, onları hansı cəzanın gözlədiyini başa düşməlidilər:
"İcra hakimiyyəti millətə uyğun davranış sərgilməlidir. İcra başçısı işi düzgün yerinə yetirməyəndə, prezidenti tənqid edirlər. Ona görə dövlət başçısı doğru addım atıb. İcra hakimiyyətlərinin yanında İctimai Şura yaradılıb. Onlar operativ işləməlidir. İcra düzgün addım atmayanda, Prezident aparatına yazmalıdılar".
Millət vəkili Aqil Abbas da vurğulayıb ki, icra başçıları xalqa xidmət etməlidirlər:
" İdarə, müəssisə, təşkilatlar icra başçılarına tabe deyillər. Nə qaz, nə su, nə elektrik idarəsi onların səlahiyyətlərinə daxildir. Hamısı mərkəzləşib. Onların torpaq vermək, bina tikmək hüququ da yoxdur".
