Torpaq sahələrinin qiymətlərində isə artım müşahidə olunur
“Ölkənin tikinti bazarında bahalaşma müşahidə olunur. Tikinti materiallarının qiyməti qalxıb. Buna səbəb dizel yanacağının bahalaşmasıdır. Çünki dizel yanacağı daşınmada mühüm rol oynayır. Onun bahalaşması bütün tikinti materiallarının qiymətinə öz təsirini göstərir. Tikinti və inşaat sektorunda qiymətlərin artması tədricən evlərin, mənzillərin və obyektlərin qiymətinə də təsir edəcək”.
Bunu Bakupost.az -a iqtisadçı ekspert Xalid Kərimli deyib.
O bildirib ki, tikinti materiallarının xüsusiyyətindən asılı olaraq onların daşıma xərclərində də qiymət artımı 25-30 faiz təşkil edir:
“Əvvəllər yük maşınları istənilən qədər yüklənə bilirdi. İndi isə elektron radarlar quraşdırılıb və bununla bağlı konkret tənzimləmə mövcuddur”.
Əmlak məsələləri üzrə ekspert Elnur Fərzəliyev isə "Sherg.az"a bildirib ki, tikinti materiallarında 30 faiz artım yoxdur:
“Cuzi miqdarda artım var. Artımın səbəbi isə tələbatla bağlıdır. Yəni yay aylarında həm fərdi həyət evlərində, həm də çoxmənzilli yaşayış binalarında tikinti işləri aparılır. Tikinti materiallarında azalma müşahidə edildikdə onların satış qiymətinə də öz təsirini göstərir. Təbii ki, satış qiymətlərinə də fərq edir. Ancaq daşınmaz əmlakın satış qiymətinə təsir edən əsas amil torpaq sahəsidir. Torpaq sahələrinin qiymətlərində artım var. Fərdi yaşayış evinin tikintisinin hər kvadratının xərci üçün ortalama məbləğ 400-500 manat arası dəyişir. Ancaq maksimum 10 faiz qalxanda isə hər kvadratda 40-50 manat fərq edir. Torpaq sahələrinin qiyməti artanda isə onun satış qiymətinidə artırır. Ümumiyyətlə isə tikinti materiallarının bahalaşması tikinti xərclərini artırdığına görə qiymətləri də artırır”.
