Bu gün xarici işlər naziri Ceyhun Bayramov ölkəmizdə səfərdə olan ABŞ-ın Avropa və Avrasiya məsələləri üzrə Dövlət Katibinin köməkçisi vəzifəsini icra edən Filip Rikerlə görüşüb.
Nazir Ceyhun Bayramov Azərbaycanla ABŞ arasında mövcud olan tərəfdaşlıq münasibətlərinin strateji xarakterini vurğulayıb və qarşılıqlı səfərlərin bu münasibətlərin inkişafına müsbət təsir göstərdiyini qeyd edib. ABŞ rəsmisi Filip Riker Azərbaycanın güclü tərəfdaş ölkə olduğunu qeyd edib və ABŞ-ın ikitərəfli münasibətlərə önəm verdiyini vurğulayıb. O, Azərbaycan Respublikası Prezidenti ilə telefon danışığına məmnunluqla istinad edib. Görüşdə, habelə qarşılıqlı maraq doğuran digər məsələlər ətrafında fikir mübadiləsi aparılıb.
Siyasi analitik Turab Rzayev ölkələr arasındakı ikitərəfli əlaqələr barədə “Sherg.az”a danışdı:
“Bu, tanışlıq səfəridir. Bayden özü hazırda Böyük Britaniyadadır. Dövlət katibinin köməkçilərindən biri isə Cənubi Qafqaza gəlib. Vaşinqton bununla bölgədə olduğunu göstərmək istəyir. Səfərin bir az gec baş verməsinə səbəb isə, çox güman, tərəflərin bəzi məsələlərdə razılıq əldə edə bilməməsi idi. Onu da deyim ki, bundan əvvəl dövlət katibi Entoni Blinken də məktubunda Azərbaycan haqqında xoş sözlər demişdi”.
T.Rzayev, həmçinin qarşılıqlı əlaqələrin əsas istiqamətlərini açıqladı:
“Son iyirmi ildə ABŞ-ın Azərbaycanla bağlı siyasəti, demək olar, stabildir. Əməkdaşlığımızda üç prioritet məsələ var- təhlükəsizlik, enerji daşıyıcıları və demokratiyanın bərqərar olması. Fikrimcə, həmin istiqamətlər bundan sonra əməkdaşlığımızın əsas mövzuları olacaq”.
