İyunun 2-də prezident İlham Əliyevlə Çin Xalq Respublikasının sədri Si Cinpin arasında telefon danışığı olub.
Dialoq zamanı Sədr Si Cinpin hər iki ölkənin ənənəvi dostluğu inkişaf etdirdiyini, əməkdaşlığı dərinləşdirdiyini və qarşılıqlı dəstəyi artırdığını bildirib. Bundan başqa, Sədr Si Cinpin Azərbaycanın “Bir kəmər, bir yol” təşəbbüsünün reallaşdırılması istiqamətində vacib tərəfdaş olduğunu və Çinin Azərbaycan xalqının seçdiyi inkişaf yolunu dəstəklədiyini vurğulayıb.
Politoloq Tofiq Abbasov tərəflər arasında əlaqələri “Sherg.az”a şərh etdi:
“Əlbəttə, münasibətlərimizin böyük perspektivi var. ABŞ və onun müttəfiqləri Çinin güclənməsini istəmirlər. Çin isə “Bir kəmər, bir yol” kimi layihələrlə özünə daha çox tərəfdaş qazanmaq və mənfəət əldə etmək istəyir. Əlbəttə, Pekinlə əməkdaşlıq bizim maraqlarımıza uyğundur və konfliktlərə qarışmırıq. ÇXR da başa düşür ki, Azərbaycan adekvat tərəfdaşdır. Ümumiyyətlə, əlaqələrimizin tarixi kökləri var. O dövrdən etibarən münasibətlərimiz süni əngəl olmadan inkişaf edir. Çin bu günü bizi olduğumuz kimi qəbul edir. Əlbəttə, dünyanın ən nəhəng dövlətlərindən biri ilə əməkdaşlıq bizim üçün də sevindiricidir”.
