Gürcüstanda ABŞ-la birgə “Agile Spirit 2021” (“Çevik ruh”) çoxmillətli hərbi təlimlər keçiriləcək. İyulun 26-da start götürəcək təlimlər avqustun 6-dək davam edəcək.
ABŞ ordusunun Mətbuat xidmətinin məlumatına əsasən, hərbi manevrlərdə 15 müttəfiq və tərəfdaş ölkə - Gürcüstan, Estoniya, Almaniya, Latviya, Litva, Polşa, Rumıniya, İspaniya, Türkiyə, Ukrayna, Böyük Britaniya, ABŞ, Kanada, İtaliya və Azərbaycandan 2 500-ə yaxın hərbi heyət iştirak edəcək. Təlimlərin keçirilməsində məqsəd ABŞ, Gürcüstan, müttəfiqlər və regional tərəfdaşların hərbi qüvvələrinin hazırlığının və qarşılıqlı fəaliyyət səviyyəsinin yüksəldilməsidir. “Agile Spirit 2021” təlimləri komanda-qərargah, çöl şəraitində keçiriləcək və batalyonlar səviyyəsində atış tapşırıqları icra olunacaq. Təlimlərdə iştirak edəcək ABŞ texnikası artıq Gürcüstana çatdırılıb.
Hərbi ekspet Ədalət Verdiyev “Sherg.az”a açıqlamasında sözügedən təlim barədə bunları dedi:
“Təlimlər 2011-ci ildən keçirilir. Keçən il pandemiyaya görə təxirə salınmışdı. Bu, onuncudur. Təlimdə iştirak edəcək 14 ölkədən 12-si ilə müxtəlif səviyyələrdə hərbi müttəfiqik. Təlimlər iki aviabazada və xüsusi təlim mərkəzində keçiriləcək. Bir çox yeniliklər, o cümlədən Gürcüstanın yerli istehsalı olan texnikanın nümayişi gözlənilir”.
Ə. Verdiyev, həmçinin “Agile Spirit 2021”-in ölkəmiz üçün əhəmiyyətindən söz açdı:
“İştirakçılar üçün sürprizlər gözlənilir. Azərbaycanın Türkiyə ordu modelinə keçməsi ərəfəsində bu təlimlərdə yer alması normaldır. Gələcəkdə hazırkı intensivlik bir az da artacaq. Fikrimcə, regional təhdidlərə operativ cavab verməkdən ötrü təlimlərdə iştirak etmək məqsədəuyğundur”.
