Azərbaycan Respublikasının Baş prokuroru Kamran Əliyevin rəhbərlik etdiyi nümayəndə heyəti Türkiyəyə səfər edib. Səfərin məqsədi Türkiyə Respublikası Ali Məhkəməsinin sədri Mehmet Akarca və Baş prokuroru Bekir Şahinin dəvəti ilə qardaş ölkənin Ali Məhkəməsi və Baş Prokurorluğunun yeni inzibati kompleksinin açılışında iştirak etməkdir. Həmçinin nümayəndə heyətimiz “Kassasiya instansiyası məhkəmələrində mükəmməllik” mövzusunda keçiriləcək beynəlxalq simpoziumda iştirak məqsədilə Ankara şəhərinə səfərə gedib.
Millət vəkili Fazil Mustafa səfərin əhəmiyyətini “Sherg.az”a qiymətləndirdi:
“Düzdür, bizim hüquq sistemlərimizdə müəyyən fərqliliklər mövcuddur. Amma nəzərə almaq lazımdır ki, Türkiyə hüquq sahəsində zəngin təcrübəyə malikdir. Bu mənada qardaş ölkədə keçirilən konfranslarda, seminarlarda iştirak etmək xeyrimizədir.
Qarşılıqlı əməkdaşlığımız güclənməlidir. Hətta qanunvericiliyimizdə müəyyən dəyişikliyə ehtiyac olsa da, eyni hüquq məkanına daxil olmağımız da faydalı ola bilər.
Fikrimcə, səfər çərçivəsində, həmçinin bu məsələlər müzakirə ediləcək”.
