Sosial şəbəkələrdə Ermənistanla Azərbaycan sərhədində baş verən insidentin yeni görüntüləri yayılıb. Bir necə gün əvvəl baş verən hadisə zamanı 50-dən çox erməni əsgərinin 5-ə yaxın Azərbaycan hərbçisinə hücum etdiyi müşahidə olunur. Əlbəttə, təəssüfləndiricidir. Həm də təəccüblüdür: niyə buna imkan verilib?! Niyə çadır və içərisindəki əsgərlərin təhlükəsizliyi təmin olunmayıb?! Axı bu, qalib orduya yaraşmayan hərəkətdir...Ermənilərin düşmən olduqlarını nə tez unutduq?!
Məsələ ilə bağlı hərbi ekspert Ədalət Verdiyev “Sherg.az”a açıqlamasında ərazi müdafiəsinin təşkilini qınayaraq bildirib ki, yerində olmayan şəxslər Silahlı Qüvvələrimizin Vətən Müharibəsində qazandığı möhtəşəm qələbəyə kölgə salmağa cəhd edirlər:
“Ərazidə yerləşmə və müdafiənin təşkili sadəcə 5 əsgəri bir çadırda, həm də əlverişsiz ərazidə taleyin qismətinə buraxmaq demək deyil. Bu proseslər onilliklər boyu qanla yazılıb. Döyüş təminatı sıfırdır.
Mühəndis işləri görülməyib, mövqelər yoxdur, rabitə təşkil edilməyib, qarşılıqlı əlaqədən danışmağa dəyməz, müşahidə məntəqəsi və atəş sektoru yoxdur, komandir də görünmür. Texnika və dəstək barədə danışmağa dəyməz. Niyə yaxınlaşan ermənilər əvvəlcədən aşkarlanmadı? Niyə 3 dəqiqəyə ehtiyatlar ora yeridilmədi?
Boşluqları saymaqla bitməz. Cavabdehlərə qarşı fikrimi ifadə etməyə söz tapmıram. Amma bilirəm ki, o əsgərlər tərxis olunandan sonra “dərinizə saman təpəcək”. Ali Baş Komandanın rəhbərliyi altında Silahlı Qüvvələrimizin Vətən Müharibəsində qazandığı möhtəşəm qələbəyə 1-2 nəfər yerində olmayan şəxs kölgə salmağa cəhd edir. Bu eyni şəxslərin törətdiyi ilk və ya ikinci cəhd deyil. Əmin olun, nəticəsi ağır olacaq”.
