Kremlin çox ciddi planları var, Ermənistana güzəştə getməyəcək
Rusiya prezidentinin köməkçisi Yuri Uşakov deyib ki, Kreml Ermənistanın Baş naziri Nikol Paşinyanın MDB-nin Bişkek sammitində iştirak etməməsinin səbəblərindən xəbərdardır. Uşakov Paşinyanın iştirak etməməsinin səbəbləri barədə yalnız bunu deyib: "Biz səbəbini bilirik, amma yəqin ki, özü bunu necəsə izah edəcək”. Uşakov vurğulayıb ki, tərəflərin müzakirə edəcəyi çox şey var. Qeyd edək ki, oktyabrın 13-də Bişkekdə MDB Dövlət Başçıları Şurasının iclası keçiriləcək. Ermənistan Baş naziri Nikol Paşinyan sammitə qatılmaqdan imtina edib.
Millət vəkili Azər Badamov deyib ki, Bişkekdə keçirilən MDB sammitində Ermənistanın iştirak etməməsi onların Azərbaycanla sülh müqaviləsi imzalamaq niyyətində olmadığını göstərir. Deputat bildirib ki, Nikol Paşinyan Rusiyanın təşəbbüsü ilə Bişkekdə keçirilən görüşdə iştirak etməyə vaxt tapmır: "Ermənistanın başı o qədər "qarışıq"dır ki, 3 saata yaxın bir məsafəni gəlməyə imkan tapmır. İrəvanın hərəkətləri gülməlidir və Bişkekə səfər etməməsinin əsas səbəbinin başqa olduğu bəllidir. Bu səbəb Ermənistanın Fransanın forpostuna çevrilməsi ilə bağlıdır. Bu gün Ermənistan Emmanuel Makronun icazəsi olmadan bir addım ata bilmir. O cümlədən Azərbaycanla sülh danışıqlarında da Fransa icazə verməsə, Ermənistan iştirak edə bilməz. Bu, bir daha Ermənistanın suveren dövlət olmadığını göstərir".
A.Badamov düşünür ki, Rusiya Ermənistana güzəştə getməyəcək: "Çox güman ki, Rusiyanın Ermənistanla bağlı çox ciddi planları var. Artıq Ermənistanın qaysısı və konyakı ruslara lazım deyil. Hətta Ermənistandan göndərilən konyakla dolu 60-dan çox yük avtomobili günlərdir sərhəd-keçid məntəqəsində dayanıb və Rusiyaya buraxılmır. Ermənistanın xarici ticarət dövriyyəsinə baxsaq, cari ilin 9 ayında əsas pay Rusiyaya malik olmaqla 4,2 milyard dolları ötüb. Fransa ilə ticarət dövriyyəsi isə cəmi 128 milyon dollardır və əsasən, Ermənistana idxalla kifayətlənir. Burdan açıq şəkildə nəticə çıxartmaq olar ki, Rusiyanın Ermənistanı ciddi şəkildə cəzalandırmağa kifayət qədər alətləri mövcuddur. Bu, Paşinyana çox baha başa gələcək".
