Dövlət sərhədinin etibarlı mühafizəsinin təmin edilməsi və narkotik vasitələrin qanunsuz dövriyyəsinə qarşı mübarizə sahəsində sərhəd mühafizə və əməliyyat-axtarış tədbirləri davam etdirilir. Dövlət Sərhəd Xidmətindən verilən məlumata görə, ümumi çəkisi təxminən 20 kiloqram 454 qram narkotik vasitəyə bənzər maddələrin dövlət sərhədindən qaçaqmalçılıq yolu ilə Azərbaycana keçirilməsinin qarşısı alınıb.
Sərhəd Qoşunlarının “Horadiz” sərhəd dəstəsinin Beyləqan rayonu Əmirzeyitli kəndi yaxınlığında yerləşən sərhəd zastavasının ərazisində sərhəd naryadı tərəfindən içərisində 3 nəfər olan “Niva” markalı 10-BF-055 dövlət nömrə nişanlı avtomobilin əraziyə yaxınlaşması, 2 nəfər şəxsin avtomobildən düşərək özlərini şübhəli aparmaları sərhəd naryadının diqqətini cəlb edib.
Bununla yanaşı, Dövlət Sərhəd Xidməti, Daxili İşlər Nazirliyi və Dövlət Təhlükəsizlik Xidmətinin əməkdaşlarının keçirdiyi birgə əməliyyat tədbiri nəticəsində Neftçala rayonu Həsənabad kənd sakini 1974-cü il təvəllüdlü Salahov Qüdrət İbadulla oğlunun həmin rayonun Kürdili adasında sahibsiz evdə gizlətdiyi ümumi çəkisi 11 kq 770 qram narkotik vasitəyə bənzər maddə (7 kq 625 qram heroin, 4 kq 145 qram tiryək) aşkar olunaraq götürülüb. Qeyd olunan faktlar üzrə əməliyyat-istintaq tədbirləri davam etdirilir.
Keçmiş polis rəisi Mahmud Hacıyev bu barədə “Sherg.az”a danışıb. Onun sözərinə görə, hüquq-mühafizə orqanlarının fəaliyyətində son vaxtlar ciddi dəyişiklik hiss olunur:
“Əvvəla, onu deyim ki, narkomaniya qlobal problemdir. Bütün ölkələrdə olduğu kimi, Azərbaycanda da bu bəlaya qarşı mübarizə aparılır. Həm Narkomaniya və narkobiznesə qarşı baş idarə, həm də DTX son aylar çox uğurlu mübarizə aparır. DTX-nin əvvəlki rəhbərliyindən fərqli olaraq, indi daha səmərəli və məqsədyönlü fəaliyyət hiss olunur. Bu, bir tərəfdən aparılan ciddi islahatlarla, əvvəlki rəhbərlikdəki “təmizləmə”lərlə əlaqəlidir. Digər tərəfdən isə daxili işlər naziri Vilayət Eyvazovun müvafiq əmri ilə Narkomaniya və narkobiznes baş idarəsinin rəisinin daha səriştəli kadrla əvəzlənməsi öz müsbət nəticəsini göstərdi. Bu, vaxtında və yerində atılan addım idi”.
