“Biz erməni əsgərini qaytarmaqla həm beynəlxalq ictimaiyyətə, həm də düşmənə humanist mövqeyimizi nümayiş etdirdik”
“Biz həm güclü, həm də haqlıyıq”
“Təlimlərimiz də göstərir ki, Azərbaycan ordusu istənilən diversiya cəhdinin qarşısını almağa və düşmənə layiqli cavab verməyə hazırdır, qadirdir”
Azərbaycan Müdafiə Nazirliyi iyunun 8-də Azərbaycan ərazisinə daxil olduğu bildirilən Ermənistan silahlı qüvvələrinin hərbçisi Artur Katanyanın buraxıldığını bəyan edib.
Katanyan Ermənistan tərəfinə təhvil verilib. Ernənistan Müdafiə Nazirliyi iyunun 8-də "hava şəraitinə görə yolu azıb Azərbaycan qoşunlarının nəzarətində olan əraziyə keçmiş və həbs olunmuş" müqavilə əsasında xidmət edən əsgər Artur Katanyanın sərbəst buraxıldığı və hazırda Xankəndidə olduğunu bildirib.
Növbəti təxribat cəhdi onu deməyə əsas verir ki, ermənilər hələ də revanşist cəhdlərindən əl çəkmək niyyətində deyillər. Necə deyərlər, islanmışın yağışdan nə qorxusu?..
Ehtiyatda olan polkovnik Şair Ramaldanov bu barədə fikirlərini “Sherg.az”la bölüşdü:
“Əslində təxribat cəhdi təəccüblü deyil. Bu, gözlənilən idi. Ermənilər düşmənlikdən əl çəkmirlər. Seçkiabağı marafonda isə sərt ritorika bir az da artıb. Siyasətçilər anti-Azərbaycan bəyanatları ilə xalqın etimadını qazanmağa çalışırlar. Bu isə onu deməyə əsas verir ki, nə Ermənistan dövləti, nə də cəmiyyəti sülhə hazırdır. Dediyim kimi, təxribatlar gözlənilirdi. Bütün ehtimallar nəzərə alınmış və silahlı qüvvələrimiz təlimatlandırılmışdı. Təsadüfi deyil ki, müxtəlif istiqamətlərdə diversiya cəhdlərinin qarşısı uğurla alındı. Bu, ermənilərə mesaj olmalı, onları pozuculuq fəaliyyətindən çəkindirməlidir. İndi bütün sərhədboyu vəziyyət Azərbaycanın nəzarəti altındadır. Laçında cəmi bir erməninin tutulması isə onu deməyə əsas verir ki, düşmən bizim ayıq-sayıqlığımızı yoxlamaq istəyib”.
Ş.Ramaldanov, həmçinin Azərbaycanın bütün təxribat cəhdlərinə adekvat cavab verəcəyini söylədi:
“Ermənistanın hərbi və siyasi hakimiyyəti arasında uçurum var. “Qara qüvvələr” isə bundan istifadə edirlər. Seçkilərədək təxribatların davam edə biləcəyi istisna deyil. İyunun 20-dən sonra da Ermənistanda xaos yaşanacaq və bunun əks-təsiri sərhəddə özünü göstərəcək. Odur ki, Azərbaycan hər situasiyaya hazırdır. Biz erməni əsgərini qaytarmaqla həm beynəlxalq ictimaiyyətə, həm də düşmənə humanist mövqeyimizi nümayiş etdirdik. Fəqət, biz həm güclü, həm də haqlıyıq. Təlimlərimiz də göstərir ki, Azərbaycan ordusu istənilən diversiya cəhdinin qarşısını almağa və düşmənə layiqli cavab verməyə hazırdır, qadirdir”.
