Azərbaycan Respublikasının Prezidenti İlham Əliyevin Avropa İttifaqı Şurasının Prezidenti Şarl Mişel və Ermənistan Baş naziri Nikol Paşinyanla görüşündə Qarabağda yaşayan erməni əsilli sakinlərin Azərbaycanın tərkibində Azərbaycan Konstitusiyası və suverenliyi çərçivəsində yaşaması müzakirə olunub.
Bu barədə APA-nın Brüsselə ezam olunmuş əməkdaşı xəbər verib. Eyni zamanda görüşdə Qərbi Azərbaycan icması və onların qayıdışı məsələsi müzakirə mövzusu olub.
Brüssel görüşlərinin dünya mediasında gündəmə çevrildiyini söyləyən millət vəkili Məlahət İbrahimqızı "Sherg.az"a bildirib ki, bu görüşü 44 günlük savaşdan sonra qazanılan ən böyük uğur kimi qiymətləndirmək olar:
"Çünki bu dəfəki müzakirələrdə Qərbi azərbaycanlıların öz yurdlarına qaytarılması məsələsi də masaya yatırılıb. Ümumiyyətlə beynəlxalq səviyyədə keçirilən görüşlərin gündəm mövzuları bütün tərəflərin razılığı ilə olur. Qərbi azərbaycanlıların torpaqlarına qaytarılmasının gündəliyə salınması isə böyük diplomatik uğurdur. Ona görə ki, Qərbi azərbaycanlıların öz torpaqlarına qayıtması Ermənistan üçün asan məsələ deyil. Yəni rəsmi İrəvan üçün yeni bir hadisədir. Hamı bilir ki, son ilk yüz il ərzində Azərbaycanın Qərb hissəsi olan indiki Ermənistan erməniləşdirildi. Hətta 20-ci əsrin əvvəlindən, sonuna qədər bütün azərbaycanlılar deportasiya və etnik təmizləməyə məruz qaldılar. Yəni müxtəlif yollarla torpaqlarından çıxarıldılar və yerlərinə ermənilər köçürüldü. Bu gün bütün dünya gücləri və beynəlxalq təşkilatlar bilir ki, Qərbi Azərbaycan necə erməni dövlətinə çevrilib. Ona görə də belə bir məsələnin gündəmə salınması İlham Əliyev diplomatiyasının ən böyük uğurudur".
Xanım parlamentari əlavə edib ki, Qərbi azərbaycanlılar sülh yolu ilə və ləyaqətli şəkildə öz yurdlarına qayıtmalıdır:
"Bunda beynəlxalq təşkilatlar məsuliyyət daşıyır. Biz yalnız işğal olunmuş Qarabağı azad etmişik. Amma 87-ci ildən etnik təmizləməyə məruz qalan 300 min azərbaycanlının soyqrımına və deportasiyaya məruz qalması məsələsi bitməyib. Qərbi Azərbaycan İcması da bunda israrlıdır və bütün beynəlxalq təşkilatlara müraciətlər ünvanlayıb. Bu hazırda da davam edir. Əminik ki, Qərbi azərbaycanlılar tezliklə öz yurdlarına qayıdacaq".
