Məlum olduğu kimi, Türkiyə dövlət başçısı Rəcəb Tayyib Ərdoğan bir neçə həftə sonra Azərbaycana gələcək. O, səfər çərçivəsində həm də Şuşada olacaq. Məhz bununla bağlı olaraq müxtəlif iddialar səslənir. Bəzilərinin fikrincə, Şuşada Türkiyənin hərbi bazasının yaradılması gündəmdədir.
Sosial Tədqiqatlar Mərkəzinin mətbuat xidmətinin rəhbəri, beynəlxalq məsələlər üzrə ekspert Əziz Əlibəyli isə “Sherg.az”a açıqlamasında bu variantı istisna etdiyini dedi:
“Əlbəttə, səfər qarşılıqlı əməkdaşlıq, Qarabağdakı yendənqurma işləri, geostrateji dinamikanın müəyyənləşməsi baxımından çox əhəmiyyətlidir. Şübhəsiz ki, bundan sonra hərbi əməkdaşlığımız daha da güclənəcək. Amma nəinki Şuşada, digər yerlərdə də Türkiyənin hərbi bazasının yaradılması aktual deyil. Çünki Azərbaycan Qoşulmama Hərəkatının üzvüdür və bu, hansısa xarici dövlətin ölkə ərazisində hərbi baza yaratmasını qadağan edir”.
