Rusiya və Türkiyə prezidentləri Vladimir Putin və Rəcəb Tayyib Ərdoğan arasında telefon danışığı baş tutub. Danışıqlar zamanı Rusiya və Türkiyə liderləri Dağlıq Qarabağ ətrafındakı vəziyyətlə bağlı fikir mübadiləsi aparıblar, atəşkəsə nəzarət üzrə Rusiya-Türkiyə Birgə Mərkəzinin fəaliyyətinə müsbət qiymət verilib.
Türkiyə Prezidenti Rusiya, Ermənistan və Azərbaycan liderlərinin 10 noyabr 2020-ci il və 11 yanvar 2021-ci il tarixli bəyanatlarında təsbit olunmuş razılaşmaların tam şəkildə həyata keçirilməsini təmin etmək üçün Rusiyanın səylərini dəstəklədiyini bildirib. İqtisadi inkişaf və regionun nəqliyyat infrastrukturunun bərpası maraqları daxil olmaqla koordinasiyanı davam etdirməyə qarşılıqlı hazırlıq ifadə olunub.
Keçmiş xarici işlər Tofiq Zülfüqarov tərəflər arasındakı telefon danışığını “Sherg.az”a şərh etdi:
“Əvvəla, onu deyim ki, dövlət başçıları arasında təkcə Qarabağ yox, başqa məsələlər də müzakirə oluna bilər. Hər halda Türkiyə Rusiya ilə münasibətlərdə bundan sonra Qərbin təmsilçisi kimi çıxış edəcək. Bu, tərəflər arasındakı partnyorluq əlaqələrini korlaya bilər. İkinci bir tərəfdən isə, Qərblə Rusiya əlaqələrinin heç də müsbət məcrada inkişaf etmədiyini nəzərə almalıyıq. Əksinə, gərginlik tədricən artır. Deməli, Moskvanın regional məsələləri Ankara ilə müzakirə etməsi onun üçün daha uyğundur. Belə ki, dövlətlər arasında müəyyən ziddiyətlərin olmasına rəğmən, qarşılıqlı inam və etibar problemləri aradan qaldırmağa imkan yaradır. Zənnimcə, təmasların nəticəsini yaxın zamanda görəcəyik”.
