Yasamal Rayon Məhkəməsinin inzibati binasında erməni cinayətkarları Mkrtiçyan Lüdvik Mkrtiçoviç və Xosrovyan Alyoşa Aramaisoviçin cinayət işi üzrə məhkəmənin iclası başlayıb. Bakı Hərbi Məhkəməsinin hakimi Elbəy Allahverdiyevin sədrliyi ilə keçirilən prosesdə təqsirləndirilən şəxslərin anket məlumatları dəqiqləşdirilib.
Bildirilir ki, Ermənistan Respublikasının vətəndaşı 1969-cu il təvəllüdlü Mkrtiçyan Lüdvik Mkrtiçoviç Azərbaycan Respublikasının Dağlıq Qarabağ bölgəsində yaşayan, habelə Ermənistan Respublikasından gəlmiş millətçi ermənilərdən ibarət yaradılmış silahlı qrupların fəaliyyətində iştirak edib.
İstintaqla Lüdvik Mkrtiçyan tərəfindən 11 nəfər əsir götürülmüş Azərbaycan vətəndaşının müxtəlif vaxtlarda Xocavənd və Ağdərə rayonları ərazisində, Şuşa həbsxanasında və Ermənistanın İrəvan şəhərində qanunsuz saxlanıldığı yerlərdə döyülərək müxtəlif xarakterli işgəncələrə məruz qaldığı bəlli olub. Həmçinin Müdafiə Nazirliyinin N saylı hərbi hissəsinin hərbi qulluqçusunun avtomat silahdan atəş açılaraq öldürüldüyü müəyyən edilib.
Məhkəmə prosesini “Sherg.az”a dəyərləndirən millət vəkili Razi Nurullayev bildirib ki, Azərbaycan erməni vəhşiliklərini göstərmək üçün həyatını itirmiş vətəndaşlarımız barəsində bütün məlumatları toplayıb:
“Eyni zamanda lazımi istintaq tədbirləri də görülərək protokollaşdırılıb. Məhz bu fəaliyyətin nəticəsində aşkara çıxarılıb ki, hansı ermənilər bu cinayətlərin törədilməsində rol alıblar? Artıq onların ikisi üzərində məhkəmə prosesi başlayıb. Bu, çox böyük bir məhkəmə prosesi olacaq, həm Ermənistanda, həm də dünyada izlənəcək. Ermənilər isə bu durumdan şou düzəltməyə çalışacaqlar. Lakin bütün həqiqətləri üzə çıxarmış olacağıq.
Azərbaycan tərəfində xeyli erməni terrorçusu var. Onların şəxsiyyətlərinin müəyyənləşməsi üzərində iş aparılır ki, hansısa cinayətlərdə əli olanlar məhkəmə qarşısına çıxarılsın. Bütün bunlar Azərbaycanın öz gücü ilə etdikləridir. Amma məsələ ilə bağlı dünyadan kömək gözləsək, nəsə əldə edə bilmərik. 30 il gözlədik, hansısa nəticə olmadı. Ancaq hər bir faktı dünyaya açıq şəkildə çatdırırıq və buna davam edəcəyik. Beynəlxalq təşkilatlar da tədbir görmədiklərinə görə utansınlar və vicdan əzabı çəksinlər ki, 30 ildə BMT-nin verdiyi qərarları eyrinə yetirə bilmədilər. Azərbaycan isə təkbaşına və öz gücü ilə bunu etdi”.
