Ermənistan müdafiə naziri vəzifəsini icra edən Vaqarşaq Arutyunyan Rusiyaya qaçıb.
O, hazırda Moskvadadır. V.Arutyunyan iki ölkə arasında hərbi-siyasi əməkdaşlıqla bağlı danışıqlar aparmaq niyyətindədir. Deyəsən, yenə də “pişiyin quyruğu qapıda qalıb”. Nə edək, bu da onların “milli mentalitetidir”...
Siyasi analitik Turab Rzayev Arutunyanın Moskvaya səfəri barədə “Sherg.az”a danışdı:
“Ermənistan Azərbaycanı pis vəziyyətə salmaq, özünü haqlı göstərmək istəyir. Məsələ ondan ibarətdir ki, KTMT Qarabağ müharibəsinə müdaxilə edə bilmədi.
Çünki Ermənistan üçün təhdid yox idi. İndi rəsmi İrəvan bütün vasitərlə Azərbaycanın Ermənistan sərhəddini pozmasına və ya hadisələri belə təqdim etməyə çalışır.
Bir neçə ehtimal var: Rusiyanı əvvəl-axır proseslərə qarışmağa məcbur etmək. Hərçənd, bu, o qədər də real görünmür. İkincisi, Rusiyanın Ermənistanı müdafiə etmədiyini göstərmək və məğlubiyyətdə bütün məsuliyyəti şimal qonşumuzun boynuna atmaqdır. Habelə düşmən Qərblə yaxınlaşmaq, Avropadan kömək almaq üçün özünə zəmin yaradır”.
T.Rzayevin fikrincə, genişmiqyaslı hərbi əməliyyatlar gözlənilmir:
“Bizim Ermənistan ərazisini hədəf almaq niyyətimiz yoxdur. Düşmənin isə gücü qalmayıb. Xüsusilə xaricdən dəstək almasa, istəsə də nə isə edə bilməz. Amma sərhəd toqquşmaları istisna deyil. Növbəti təxribat cəhdləri olarsa, təbii ki, diversantlar zərərsizləşdiriləcək”.
