Ermənistanda XİN-lə hakimiyyət arasında qalmaqallı vəziyyətin hökm sürdüyü bir vaxtda ölkədə daha bir qurumda xaosun tüğyan etdiyi ortaya çıxıb. Bu barədə “Joxovurd” qəzeti yazıb. Nəşr Ermənistanın Hərbi İstintaq İdarəsində “istefa paradı”nın başladığını qeyd edib. Belə ki, erməni müstəntiqlər sözügedən sahədə minlərlə cinayət işlərinin olmasından və işlərə baxmağa çatdıra bilmədiklərindən şikayət edirlər. Ölkədə hərb sahəsində istintaqların aparılması tapşırılan müstəntiqlər kütləvi şəkildə istefa verərək prokurorluq orqanlarına keçirlər.
“Onlar hərbi sahədəki işləri araşdırmağa çatdırmadıqları üçün “daha sakit və rahat” işə - prokurorluq orqanlarında çalışmağa meyl edirlər”, - deyə nəşr qeyd edib.
Tanınmış jurnalist, siyasi şərhçi Fuad Abbasov düşmən ölkədəki mövcud vəziyyəti “Sherg.az”a şərh etdi:
“Görünür, həmin müstəntiqlər yalan danışmağa, vəzifə səlahiyyətlərini aşmağa məcbur edilirlər. Lakin bu, Paşinyan hakimiyyətinə təhdid kimi qiymətləndirilməməlidir. Həmin məmurlar başqaları ilə- yalan danışa bilənlərlə əvəzlənəcəklər. Fikrimcə, müstəntiqlərin də hansısa tələbi yoxdur. Əks halda həmkarlar ittifaqı vasitəsilə çağırış, xəbərdarlıq edərdilər”.
