Ermənistan silahlı qüvvələrinin bölmələri Naxçıvan Muxtar Respublikasının Sədərək rayonu istiqamətində təxribata əl ataraq yanğınlar törətməyə cəhd ediblər. Bu barədə Müdafiə Nazirliyi məlumat yayıb. Atəşkəsi pozmaqla kifayətlənməyən düşmən artıq ekoloji terrora əl atır. Bu, ən son hədd deyil də, nədir?!
“Sherg.az” olaraq düşmənin çirkin əməllərinə dair millət vəkili Elman Məmmədovla söhbətləşdik:
- Davam edən provokasiyaları necə qiymətləndirirsiniz?
- Ermənilər təxribatlarından əl çəkmirlər. Düşmən özünü tərbiyəsiz uşaq kimi aparır. Beynəlxalq təşkilatlar emrənilərin “qulaqlarını burmurlar”. Havadarları isə qarşı tərəfi daha da təhrik edir, şirkinləndirir. Görünür, İrəvanı Bakı “tərbiyələndirməlidir”. Əslində baş verənlər bütünlüklə Ermənistan cəmiyyətinin təzahürüdür.
- Niyə belə düşünürsünüz?
- Təkcə orduda deyil, hakimiyyətdə, dövlətin ayrı-ayrı strukturlarında da başıpozuqluq var. Parlamentdə iki gün ard-arda əlbəyaxa davanın olması erməni xalqının tərbiyəsindən xəbər verir. Onların havadarları, erməniləri mədəni toplum hesab edənlər bundan nəticə çıxarmalıdırlar.
- Yəqin, həm də Rusiya…
- Əlbəttə. Rusiya müdafiə naziri Sergey Şoyqunun erməni həmkarı Arşak Karapetyana xəncər hədiyyə etməsi, ordunun müasirləşdirilməsinə dəstək verəcəyini deməsi çox şeydən xəbər verir.
- Ermənistan baş naziri Nikol Paşinyan bir tərəfdən loyal bəyanatlar səsləndirsə də, digər tərəfdən bu cür dekonstruktiv addımlar atılır. Bu nə ilə bağlıdır?
- Düzdür, onun yekun sülh müqaviləsinə hazır olduğunu deməyinə rəğmən, təxribatlar səngimir. Bu azmış kimi, ərazi iddiları irəli sürülür, Qarabağdakı ermənilər üçün hansısa “statusdan” danışılır. Çünki iqtidar orduya və cəmiyyətə nəzarət edə bilmir. Həmçinin Paşinyan əleyhinə olan qüvvələr, xüsusilə “Qarabağ klanı” “suyu bulandırmağa” çalışır. Dövlət faktiki olaraq idarəolunmaz vəziyyətdədir. Görünür, “bu xəmir hələ çox su aparacaq”. Ermənilər asanlıqla islah olana oxşamırlar.
