“Ruslar Türkiyə, İsrail yüklərinin də daşınmalarına icazə verərdilərmi? Əlbəttə, yox”
“İran bu və ya digər formada məsuliyyəti öz boynundan ata bilər”
“Amma əsas məsələ odur ki, sülhməramlılar vəzifələrini yerinə yetirmirlər”
Azərbaycan bu ilin avqustunda çoxlu sayda İran yük maşınlarının Rusiya sülhməramlı qüvvələrinin müvəqqəti məsuliyyət zonasına rəsmi Bakının icazəsi olmadan qanunsuz keçdiyi barədə məlumat əldə edib. Belə ki, iyulun 11-dən avqustun 8-dək İrana məxsus 35 maşın (4 yük maşını və 31 yanacaq tankeri) Laçın dəhlizindən 70 dəfə girib və çıxıb. Giriş-çıxış tarixləri də məlumdur - 11, 14, 16, 17, 20, 21, 27, 28, 29, 31 iyul, həmçinin 3, 4, 5, 6, 7 avqust.
Bundan sonra, bu il avqustun 11-də İran İslam Respublikasının ölkəmizdəki səfiri Seyid Abbas Musəvi Azərbaycan Xarici İşlər Nazirliyinə dəvət edilib. Səfirə nota verilib və İran tərəfinin Azərbaycanla bağlı atdığı qanunsuz addımlardan ciddi narahatlıq ifadə edilib. Səbəb, həqiqətən, tutarlı idi: İran yük maşınları ilə Qarabağa qanunsuz yük daşınması. Azərbaycan tərəfinin Azərbaycan-İran münasibətlərinə kölgə salan bu cür faktlardan ciddi şəkildə narahat olması aşkar surətdə səfirin diqqətinə çatdırılıb.
“Notada son dövrlər dost İran İslam Respublikasına məxsus müxtəlif təyinatlı avtomobillərin rəsmi Bakının icazəsi olmadan davamlı olaraq Azərbaycanın Qarabağ bölgəsinə giriş-çıxış etməsi ilə bağlı narazılığımız ifadə edilib. Bir müddət əvvəl İran tərəfinə şifahi şəkildə çatdırılmış narazılığımız görüş zamanı səfirin qarşısında bir daha qaldırılıb”, - deyə Azərbaycan XİN-in Mətbuat Xidmətinin açıqlamasında bildirilib. Rəsmi Bakı həmin vaxt bəyan etdi ki, İranın yeni administrasiyası tərəfindən bu kimi qanunsuz hallara son qoyulması istiqamətində əməli addımların atılacağını gözləyir. Düz bir ay keçdi. İran tərəfi bu kimi hadisələrin qarşısını almaq üçün təsirli tədbirlər görübmü? Rəsmi Bakının etirazlarını nəzərə alıbmı? Lazımi yoxlamaları həyata keçiribmi? Qətiyyən! Caliber.Az İrana məxsus yük maşınlarının Bakının kəskin etirazına baxmayaraq, Azərbaycanın Qarabağ bölgəsinə qanunsuz daxil olmağa necə davam etdiyini göstərən eksklüziv video görüntülər əldə etdi. Bu proseslərin fonunda Gorus- Qafan tolunda polis postları qurulub.
Orta Doğu Araşdırmalar Mərkəzinin rəhbəri Sədrəddin Soltan bu barədə “Sherg.az”a danışdı:
“Biz öz ərazimizdə polis postları qurmuşuq. Bunun kimsəyə- nə Rusiyaya, nə İrana, nə də Ermənistana aidiyyəti var. Hətta Azərbaycanın orada gömrük xidməti yaratmaq hüququnu da özündə saxlayır. Torpaqlarımız işğal altında olanda da oraya İran maşınları gedirdi. İndiki halda bütün məsuliyyəti ruslar daşıyır. İran maşınlarının Qarabağda olması sülhməramlıların məsuliyyətsizliyi, öz mandatlarını yerinə yetirməməsi deməkdir. Rusiya icazə verməsə, İran avtomobillərinin Qarabağda nə işi var?! Ruslar Türkiyə, İsrail yüklərinin də daşınmalarına icazə verərdilərmi? Əlbəttə, yox. İran bu və ya digər formada məsuliyyəti öz boynundan ata bilər. Amma əsas məsələ odur ki, sülhməramlılar vəzifələrini yerinə yetirmirlər”.
S. Soltanın sözlərinə görə, sülhməramlılar “suyu bulandırırlar”:
“Məlum olduğu kimi, Qarabağdakı ermənilər Azərbaycan vətəndaşlarıdırlar. Gələcəkdə inteqrasiya olmalıdır. Amma ruslar torpaqlarımızda qaldığı müddətcə bunun qarşısını alacaqlar. Eyni zamanda Rusiya məhz bu cür addımlarla Bakı- Tehran münasibətlərinə də zərbə vurur. Bir daha xatırladıram ki, İran maşınlarının Qarabağa girməsinə məhz ruslar şərait yaradıb”.
Kənan Novruzov
