Ermənistanla nəsə danışmaq, onların ekstradisiyasından söhbət gedə bilməz
"Həbs olunan separatçılar Azərbaycanın suveren ərazilərində terror hadisəsi həyata keçiriblər, insanların kütləvi qırğınlarında iştirak ediblər".
Bunu "Sherg.az"a açıqlamasında Vətəndaş Həmrəyliyi Partiyasının sədr müavini, siyasi şərhçi Samir Əsədli deyib. Ekspert bildirib ki, onların Xocalı soyqırımının təşkilində əlləri var: "Həmçinin Azərbaycan Ordusunun hərbi qulluqçularına qarşı əməliyyatlar həyata keçiriblər. Mülki insanların, hərbi qulluqçuların qətlə yetirilməsində xüsusi rol oynayıblar. Bunlarla bağlı illərlə toplanılmış cinayət materialları var və bütün hallarda hüquq imkan verir ki, bu şəxslər Azərbaycan Respublikasının qanunvericiliyi çərçivəsində cəzalandırılsınlar. Bako Saakyan, Arkadi Qukasyan, David İşxanyanın Qarabağ bölgəsində həyata keçirdikləri terror aktları, ərazi bütövlüyümüzün pozulması, separatizm və terrorçuluq fəaliyyəti faktlarla isbat olunub. Araik Arutyunyanın əmri ilə Vətən müharibəsi zamanı Gəncə, Bərdə, Tərtər və başqa yerlərə raket hücumlarının təşkil olunması reallıqdır. Həmçinin müharibə vaxtı qadağan olunmuş silahlardan istifadə olunması əmrini də həmin separatçılar verib".
S.Əsədli vurğulayıb ki, adıçəkilən şəxslər Azərbaycan qanunvericiliyi çərçivəsində ən sərt formada cəzalandırılmağı haqq edirlər: "Ruben Vardanyan Rusiya vətəndaşlığından imtina edib. O, terrorçuluğu, qanunsuz silahlı birləşmələri maliyyələşdirməklə məşğul olub. Bu adam Azərbaycan dövlətinin icazəsi və razılığı olmadan ərazimizə gəlib və orada bir çox terror aktlarının, separatçılıq meyillərinin həyata keçirilməsinə birbaşa rəhbərlik edib. Bunlar faktla sübut olunub. Əli qanlı separatçılar barədə Ermənistanla nəsə danışmaq, onların ekstradisiyasından söhbət gedə bilməz. Onlar mütləq cəzalarını çəkməlidir. Bununla Robert Koçaryan və Serj Sarkisyanı da Ermənistandan tələb etməliyik".
