Müdafiə naziri general-polkovnik Zakir Həsənov Kəlbəcər rayonu ərazisində inşası davam etdirilən təlim poliqonuna baxış keçirib. Bu barədə Müdafiə Nazirliyi məlumat yayıb. Məlumat verilib ki, təlim poliqonu çətin və yüksək dağlıq şəraitində yerləşən hərbi hissələrin şəxsi heyətinin peşəkar hazırlığının yüksəldilməsi məqsədilə hazırlanır.
Qoşunların hazırlıq planına əsasən poliqonda ixtisaslı təlimatçılar tərəfindən döyüş şəraitinə tam uyğunlaşdırılmış, relyefin tələblərinə cavab verən təlim məşqləri həyata keçiriləcək. Müxtəlif çaplı silahlardan təlim atəş çalışmalarının yerinə yetirilməsi və zirehli texnikanın təlim-məşq tapşırıqlarının icra olunması üçün inşa edilən poliqonda görülən işlərlə maraqlanan nazir müvafiq tapşırıqlar verib.
Ehtiyatda olan polkovnik Şair Ramaldanov Zakir Həsənovun Kəlbəcərə səfərini “Sherg.az”a şərh etdi:
“Burada qeyri-adi bir şey yoxdur. O, azad olunmuş torpaqlarımıza əvvəllər də dəfələrlə gedib. Məqsəd tapşırıqların icrasını yoxlamaq və hərbi hissələrin fəaliyyətinə nəzarət etməkdir. Hazırda oralarda hərbi infrastuktur qurulur, bazalar, poliqonlar yaradılır. Müdafiə Naziri bütün vəziyyətə nəzarət edir. Nəzərə almaq lazımdır ki, Kəlbəcər mühüm istiqamətdir və qarşıdan qış gəlir. O vaxtadək zəruri işləri yekunlaşdırmalıyıq. Çünki təxribatlar istisna deyil. Ümumiyyətlə, Zakir Həsənov kabinet naziri deyil. O, həmişə cəbhədə olub”.
