Qarabağda yaşayan ermənilər Xankəndi şəhərinin mərkəzi meydanına toplaşaraq mitinq keçiriblər. Etirazçılar qondarma rejimin rəhbəri Arayik Arutunyanın istefasını tələb ediblər. Mitinqə toplaşanlar A.Arutunyanın Qarabağdakı ermənilərinin mövqeyini əks etdirmədiyini bildiriblər. Aksiya iştirakçıları onu 44 günlük müharibə zamanı erməniləri aldatmaqda ittiham edib və Ermənistanın baş naziri vəzifəsini icra edən Nikol Paşinyan kimi “kapitulyant”, yəni “təslimçi” adlandırıblar.
Mitinqə toplaşanlar “Araik, rədd ol!”, “Araik satqındır!” şüarlarını səsləndiriblər. Qondarma rejimin nümayəndələrindən Artak Beqləryan etirazçılara Arutunyanın Xankəndidə olmadığını və onun Ermənistandan Qarabağa iyunun 22-də qayıdacağını deyib. Özünü “Hadrutun işğaldan azad edilməsi” adlı təşkilatın rəhbəri kimi təqdim edən Meri Davtyan və David Avanesyan adlı Xankəndi sakini isə Arutunyanın istefası tələbi ilə aclıq aksiyasına başlayıb. Araikin rəqibləri iyunun 22-si saat 19:00-dan etibarən mitinqləri davam etdiriblər. Etirazların əsas səbəbi kimi Araik Arutunyanın Nikol Paşinyanı növbədənkənar parlament seçkilərindəki qələbə münasibətilə təbrik etməsi göstərilir.
“Atlas” Araşdırmalar Mərkəzinin rəhbəri, politoloq Elxan Şahinoğlu mövcud vəziyyəti “Sherg.az”a təhlil etdi:
“Robert Köçəryan və tərəfdarları Ermənistandakı məğlubiyyətin intiqamını Qarabağda almaq istədilər. Amma artıq sakitlikdir. Araiki devirmək üçün lazımi qüvvə yoxdur. Həm də bu, bizim üçün hansısa əhəmiyyət kəsb etmir. Separatçının yaxşısı, pisi olmur. Necə deyərlər, ilanın ağına da lənət, qarasına da. Hər halda ciddi nəticənin əldə ediləcəyinə inanmıram. Hətta Araik devrilsə belə, onun yerinə gələn adam Qarabağdakı erməniləri idarə edə bilməyəcək”.
E.Şahinoğlu, həmçinin Paşinyan iqtidarının gələcək taleyindən danışdı:
“Onun üçün hansısa təhlükə olduğunu düşünmürəm. Birincisi, Köçəryanla arasındakı səs fərqi kifayət qədər çoxdur. Bu, Paşinyana manevr imkanları verir. Eyni zamanda, Qərb, hətta Paşinyanı dəstəkləyən Rusiya belə, hazırkı baş nazirin hakimiyyətini tanıdı. Əsas məsələ iqtidarın Azərbaycan və Türkiyə ilə münasibətləri necə quracağıdır. Əgər daxildə inkişaf istəyirlərsə, sülh yolu seçməlidirlər. Paşinyan bunu etməsə, vəziyyəti ağır olacaq”.
