“Ermənistan Avropa ölkələrini delimitasiya prosesinə cəlb etmək istəyir”
Milli Məclisin iclasında deputat Fəzail Ağamalı Azərbaycan Xarici İşlər Nazirliyinə müraciət edib.
F. Ağamalı bildirib ki, Azərbaycan XİN ATƏT-in Minsk Qrupunun həmsədr institutunun ləğvi ilə bağlı məsələ qaldırmalıdır.
“Həmsədrlər onsuz da bir iş görmürlər, Kəlbəcərdəki son hadisə ilə bağlı da bir bəyanat vermədilər. Azərbaycan Xarici İşlər Nazirliyi məsələ qaldırmalıdır ki, həmsədrlik institutu ləğv edilsin”, - deyə parlamentari əlavə edib.
Siyasi analitik Turab Rzayev millət vəkilinin bu təklifini “Sherg.az”a şərh etdi:
“Əslində ATƏT-in Minsk qrupunun missiyası yoxdur. Yəni həmin institutun ləğvi ilə nəsə itirmiş olmarıq. Amma bu addımımızla beynəlxalq təzyiqlərlə üzləşəcəyik. Ermənistanla sərhəddə baş verənlər göstərir ki, Qərb bölgəyə qayıtmaq istəyir. Fransa prezidenti Emmanuel Makronun bəyanatları da bunu sübut edir. Hətta Ermənistan Avropa ölkələrini delimitasiya prosesinə cəlb etmək istəyir. Belə olan halda biz ciddi olmasa da, Minsk qrupu ilə müzakirələrimizi davam edə bilərik. Nəticədə vaxt uzadaraq digər problemlərimizi regiondakı real güclər- Türkiyə və Rusiya ilə həll edəcəyik”.
