Azərbaycan Silahlı Qüvvələrinin 15 min nəfərlik şəxsi heyətdən ibarət hərbi təlimləri davam edir. Təlimlərin sərhədlərin müəyyənləşdirilməsi ilə eyni vaxta təsadüf etməsi beyinlərdə müxtəlif suallar yaradır. İnsanları ən çox düşündürən isə budur: Azərbaycan digər torpaqlarını da azad etməkdən ötrü yeni anti-terror əməliyyatına hazırlaşır?
Hərbi ekspert Ramil Məmmədli bu barədə “Sherg.az”ın sualını cavablandırdı:
“Doğrudur, son vaxtlar təlimlərin intensivləşməsi ilə müxtəlif iddialar ortaya atılır. İddialara konkret, birmənalı cavab vermək çətindir. Lakin proseslərdə ziddiyət əmələ gəlsə, yeni müharibə başlasa, ordumuz bu təlimlərin təcrübəsindən yararlanacaq.
Deməli, təlimlərin keçirilməsi istənilən halda təqdirəlayiqdir.
İkinci bir tərəfdən xüsusi təyinatlı qoşunumuzun hazırlıq səviyyəsinin artırılması onu deməyə əsas verir ki, Qarabağ və Zəngəzurda təxribat cəhdləri olarsa, silahlı qüvvələrimiz anti-terror əməliyyatları ilə düşmənə adekvat cavab verəcək.
Ermənistan riyakarlığını davam etdirərsə və bəyanatın tələblərini yerinə yetirməkdən boyun qaçırarsa, növbəti anti-terror əməliyyatlarının keçirilməsi gözləniləndir”.
