Tbilisi merinin Kaxa Kaladze Bakıya rəsmi səfər öncəsi jurnalistlərə açıqlama verib. O, deyib ki, Bakı və Tbilisi arasında qardaşlaşma haqqında memorandumun imzalanması mühüm əhəmiyyət kəsb edir. Belə ki, Azərbaycan Gürcüstanın strateji tərəfdaşıdır.
Merin sözlərinə görə, Tbilisinin qardaş şəhərlərinin hazırkı sayı 20-dir: “Bakı Tbilisinin 21-ci qardaş şəhəri olacaq. Bu, uzun əsrlər boyu Gürcüstan və Azərbaycan arasında mövcud olan münasibətlərin dərinləşdirilməsinə böyük töhfə verəcək, müxtəlif sahələr üzrə əlaqələrimizin daha maraqlı və dostsevər olmasına şərait yaradacaq”.
Politoloq İlqar Vəlizadə tərəflər arasındakı əlaqə barədə “Sherg.az”a danışdı:
“Əslində bunun üçün gecikmişik. Çünki Azərbaycanla Gürcüstanı bir-birinə yaxınlaşdıran müxtəlif tellər var. Biz fərqli irimiqyaslı layihələrdə yan-yana olmuşuq. Həmçinin əlaqələrimizin tarixi kökləri mövcuddur. Azərbaycan- Gürcüstan münasibətlərində paytaxtlar mühüm əhəmiyyət kəsb edir. Çünki məhz paytaxtlar turizm, ticarət əlaqələrində prioritet rol oynayır. Odur ki, hətta gecikmiş olsa belə, bu təşəbbüsü yüksək qiymətləndirirəm”.
