Azərbaycan, Türkiyə və Gürcüstan parlamentlərinin Xarici əlaqələr komitələrinin iclası keçiriləcək. Belə ki, Gürcüstanın Türkiyədəki səfiri Giorgi Cancğava bu ölkənin Böyük Millət Məclisinin Xarici əlaqələr komitəsinin sədri Akif Çağatay Kılıçla görüşüb. Bu barədə Gürcüstanın Ankaradakı səfirliyindən bildirilib.
Tərəflər Gürcüstan və Türkiyə parlamentləri arasındakı mövcud münasibətlərin səviyyəsindən məmnunluq ifadə ediblər və parlament komitələrinin iki ölkənin qanunverici orqanları arasındakı əməkdaşlığın dərinləşdirilməsində oynadığı müsbət rol qeyd olunub. Görüşdə həmçinin ikitərəfli, çoxtərəfli əməkdaşlıq məsələləri və regionda baş verən proseslər də nəzərdən keçirilib. Tərəflər yaxın zamanlarda Gürcüstan, Türkiyə və Azərbaycan parlamentlərinin xarici əlaqələr komitələrinin üçtərəfli toplantısının keçirilməsinə hazırlıq ifadə ediblər.
İclasın əhəmiyyətini “Sherg.az”a şərh edən Sosial Tədqiqatlar Mərkəzinin mətbuat xidmətinin rəhbəri, beynəlxalq münasibətlər üzrə ekspert Əziz Əlibəyli qeyd edib ki, pandemiyaya kimi tərəflərin parlamentləri arasında əlaqələr yaxşı idi:
“Sonradan isə görüşlər olmadı, ancaq onlayn müzakirələr keçirildi. Yəqin ki, iclasda bölgədə üç ölkənin maraqlarının kəsişdiyi bütün məsələlər müzakirə ediləcək. Həmçinin Ermənistanın regiona yönəlik siyasəti əksini tapacaq”.
Şərhçinin sözlərinə görə, bundan sonra rəsmi Tiflislə əlaqələr daha da güclənəcək:
“Gürcüstan Rusiya ilə münasibətlərə görə “Üç qardaş-2021” təlimlərinə qoşulmadı. Amma müşahidəçi statusuna malik olması gələcəkdə Gürcüstanın da bu təlimlərə qoşulmasını istisna etmir. Türkiyə- Gürcüstan əlaqələri yüksək səviyyədədir. Tiflisin NATO-ya inteqrasiya olunmasına Ankara mühüm dəstək göstərməkdədir. Fikrimcə, bunun qarşılığı olaraq Gürcüstan Ermənistan və Rusiya ilə münasibətlərə töhfə verə bilər”.
Kənan Novruzov
