“Son vaxtlar ermənilərin diversiya-kəşfiyyat qruplarının təxribat cəhdləri də bunu deməyə əsas verir”
Məlum olduğu kimi, bir neçə gün əvvəl Kəlbəcərdə xidməti vəzifələrini yerinə yetirən iki media nümayəndəsi mina partlaması nəticəsində şəhid olub. Yayılan kadrlardan belə məlum olur ki, mina yeni basdırılıb-bəlkə də, Kəlbəcərdən çıxmaq üçün düşmənə verilən on günlük müddətdə. Görünür, ermənilər hələ də revanşist niyyətlərindən əl çəkməyiblər.
Ukraynalı hərbi jurnalist Roman Boçkala bu barədə “Sherg.az”a danışdı:
“Əlbəttə, faciəvi hadisədir. Fürsətdən istifadə edib bütün Azərbaycan xalqına və şəhidlərin yaxınlarına baş sağlığı verirəm. Təəssüflə deməliyəm ki, Ermənistanın siyasi mövqeyi dəyişməyincə, törətdiyi əməllərin məsuliyyətini dərk etməyincə belə hadisələr təkrarlanacaq. Hər halda indiyədək minalı torpaqların xəritəsi verilməyib. Mən ərazini yaxşı tanıyıram. Qarabağ barədə film çəkmişəm. Böyük ehtimalla minalar sonradan yerləşdirilib. Son vaxtlar ermənilərin diversiya-kəşfiyyat qruplarının təxribat cəhdləri də bunu deməyə əsas verir”.
R.Boçkala rəsmi İrəvanın məsuliyyət daşıdığını dedi:
“Ukraynanın şərqində də eyni vəziyyətdir. Oradakı duruma görə Rusiya, Qarabağda baş verənlər üçün isə Ermənistan məsuliyyət daşıyır. Odur ki, rəsmi İrəvan xəritəni verməklə yanaşı, həm də minaların təmizlənməsi işində fəal iştirak etməli, o cümlədən maddi təzminat ödəməlidir. Əgər tərəflər arasında razılaşma olubsa, Azərbaycan kimi, Ermənistan da şərtlərə əməl etməlidir. Əks halda başına gələcəklərə görə özü cavabdehdir”.
