17 saylı körpələr evi və uşaq bağçasında yerləşən 14 saylı Yasamal ll seçki dairəsində seçici aktivliyi müşahidə olunur.
"Sherg.az"-ın seçki məntəqəsindəki əməkdaşının verdiyi məlumata görə, həmin məntəqədə 1416 seçici qeydiyyatdadır. DSK sədri Solmaz Hacıyeva bildirib ki, seçicilərdən iki nəfərinin məntəqədə səsvermə imkanları məhdud olduğundan məntəqə işçiləri onların qeydiyyatda olduqları ünvanlara səyyar seçki qutuları ilə baş çəkəcəklər:
"Saat 11:00-a qədər səs vermək üçün gələn seçicilərin sayı 191 nəfərdir. Ən cavan seçicimiz – 19 yaşlı Paşazadə Leyla Mətləb qızı bir qədər səsvermədə iştirak etdi. Səs verən ən yaşlı seçicimizin 75 yaşı var. Hələlik heç bir qayda pozuntusu qeydə alınmayıb. Ümumilikdə isə ən yaşlı seçicimizin 93 yaşı var. O, qeyd etdiyim kimi evdə səs verəcək”.
S. Hacıyevanın sözlərinə görə, seçkiləri 30-a yaxın müşahidəçi izləyir. Beynəlxalq müşahidəçilər isə səhərin erkən saatlarında məntəqəyə baş çəkiblər:
"Seçicilərin rahat şəkildə səs verməsi üçün hər bir şərait yaradılıb".
Qeyd edək ki, vətəndaşlar bu gün axşam 20:00-a qədər qeydiyyatda olduqları seçki məntəqələrinə gələrək seçkilərdə iştirak edə bilərlər.
Aysel Aslan
