ABŞ prezidenti Donald Trampın 20 ildən bəri Türkiyədə yaşayan keşiş Bransona görə Ankaraya açdığı savaş günlərdir müzakirə olunur. Ağ Ev rəhbərinin gözlənilməz aqressiyası bir çox ölkə liderləri üçün anlaşılmaz olaraq qalmaqdadır. Biznesmen Trampın məqsədini tam olaraq anlaya bilməyən Avropa dövlətlərinin rəhbərləri onu mümkün qədər təmkinli olmağa səsləyirlər.
Analitiklər isə həbs olunana qədər varlığı əhəmiyyət kəsb etməyən bir rahibin birdən-birə qiymətə minməsinin səbəblərini çözməyə çalışırlar. Böyük Britaniyanın "Financial Times” qəzeti Trampın Branson sevgisinin pərdəarxasına nəzər salıb. Qəzetin iddiasına görə, Vaşinqtonun Branson israrı 8 noyabrda ABŞ Konqresinə keçiriləcək ara seçkilərlə bağlıdır.
Tramp Konqresdə demokratlar üzərində qələbə çalmaq üçün yevangelistlərin dəstəyini qazanmaq istəyir. Bu səbəbdən yevangelist rahib Bransonun o tarixə qədər azadlığa çıxmasına nail olmağa çalışır. Lakin Türkiyə cinayətləri təsdiqlənmiş rahibi buraxmadığı üçün Tramp daha da coşur və müttəfiqini iqtisadi terrorla hədələyir. Yevangelistlərin də Trampın bu addımlarından məmnun qaldıqları bildirilir. Xatırladaq ki, ABŞ prezidenti yevangelistlərin dəstəyini qazanmaq üçün başqa addımlar da atıb. Məsələn, xarici işlər naziri postunu onlardan olan Mike Pompeoya həvalə edib.
Branson "əməliyyatı”nı "Şərq”ə dəyərləndirən Sülh və Münaqişələrin Həlli Mərkəzinin rəhbəri Məhəmməd Əsədullazadənin sözlərinə görə, ABŞ-Türkiyə arasında gərginləşən siyasi əlaqələr əsasən Türkiyə rəhbərliyinin apardığı müstəqil siyasətin nəticəsidir. Analitik də bəyan edib ki, prezident Tramp Konqres seçkilərində 60 milyonluq yevangelistlərin dəstəyini almaq üçün rahib Bransona dəstək çıxıb və Türkiyəyə sanksiya tətbiq edib. Lakin politoloqun fikrincə, keşiş həbsdən azad edilsə və ABŞ-a qayıtsa belə Ağ Ev Türkiyəyə qarşı iqtisadi təzyiq rıçaqlarından əl çəkməyəcək:
"Türkiyə Rusiya ilə hərbi-ticari əlaqələrini möhkəmləndirir. Rusiyadan S-400 raket komplekslərinin alınması, Suriyada İranla birgə koordinasiyalı fəaliyyət göstərməsi, Ağ Evdən gələn təlimatlara əməl edilməməsi Tramp administrasiyasını Türkiyə əleyhinə addımlar atmağa sövq edir. Amerikalı keşişin Tramp üçün önəmi seçkilərə qədərdir. Keşişin azad olunması ilə prezident böyük dəstək əldə edəcək”. M.Əsədullazadəyə görə, Türkiyə-ABŞ arasında bundan sonra strateji-siyasi əlaqələrin inkişafı mümkün deyil: "Amerikada yalnız yeni administrasiya fonunda Vaşinqton-Ankara münasibətləri formalaşa bilər”.
İsmayıl
