"Azərbaycan Xalq Cümhuriyyətinin (AXC) 100 illiyinin qeyd olunmasına dair sərəncamın verilməsi insanlarda AXC-nin təsadüfən yaranmadığı, aparılan ağır, şərəfli mübarizədən sonra ərsəyə gəldiyi fikrini gücləndirdi”.
Bu barədə "Sherg.az”a "Cümhuriyyət ili” çərçivəsində görülən tədbirlərdən danışarkən tarixçi alim Boran Əzizli bildirib.
Onun sözlərinə görə, bu il görüləcək tədbirlər insanlarda vətənpərvərlik hisslərinin yüksəldilməsinə, gənclərin bu ruhda tərbiyə olunmasına böyük köməklik göstərə bilər:
"Dövlətin gücü tək ordunun sayı, hərbi texnikanın müasirliyində deyil. Bununla bərabər, xalqın, insanların şüur səviyyəsinin yüksəkliyi, yaşadıqları dövlətə bağlılığı, bu dövlətlə fəxr etməsi də vacibdir. Belə situasiya dövlətin gücünü dəfələrlə artırmış olar. Ona görə, insanlarda vətənpərvərlik ruhunun yüksəldilməsinə bu fərman köməklik göstərəcək.
Cümhuriyyətin 100 illiyinin layiqincə qeyd edilməsi üçün əlimizdən gələn köməkliyi göstərməliyik. Görülən işlərə kölgə sala bilmərik, amma görməli işlərimiz hələ də çoxdur. Cümhuriyyət liderlərinin qəbirlərinin Azərbaycana gətirilməsini arzu edərdik. Həmçinin, bu şəxsiyyətlər üçün fəxri məkan salınsın, insanların ziyarət edəcəyi Cümhuriyyət parkı olsun.
BDU-da, digər ali təhsil müəssisələrində, idarə və təşkilatlarda Cümhuriyyətin tarixi ilə bağlı konfranslar keçirilir, məqalələr yazılır. 100 illiklə bağlı hazırladığımız əsər də yaxın vaxtlarda çap olunacaq”.
Aysel Aslan
