1942-ci ilin 23-26 mart tarixlərində Smolensk ətrafında gedən döyüşlərdə həlak olmuş azərbaycanlıların cəsədlərinin qalıqlarını tapmaq hələ mümkün olmayıb. Bu barədə Lent.az-a açıqlamasında Moskvada fəaliyyət göstərən Azərbaycan Mədəniyyətinin İnkişafı və İntibahı Fondunun sədri Şamil Tağıyev bildirib.
Şamil bəyin dediyinə görə, bir qədər əvvəl "Rubej” Axtarış Qrupu Rusiya Müdafiə Nazirliyinin Podolskda yerləşən arxivindən aralarında azərbaycanlıların da olduğu siyahını tapmışdı. Həmin siyahıda həlak olmuş azərbaycanlı döyüşçülərin adı, atasının adı və soyadı ilə yanaşı, təvəllüdü və cəbhəyə hansı hərbi komissarlıqdan çağırılması ilə bağlı qeydlər var.
Bundan sonra o da məlum olmuşdu ki, "Rubej" üzvü Aleksandr Tumanov və digər qrup üzvləri aprelin 22-də yenidən Smolensk ətrafında yerləşən Kuvşinovo kəndinə yollanacaq, axtarışa başlayacaqlar. "Artıq axtarış başa çatıb. Hələ ki bir neçə cəsədin qalıqları aşkar edilib. Tumanovun mənə dediyinə görə, ərazi həddən artıq böyükdür. Təxminən 4 kv. km ərazini əhatə edir. Bu dəfə axtarış həm də maddi vəsait üzündən dayandırılıb. Bilirsiniz, Axtarış Qrupu könüllülərin ianəsi hesabına aparılır. Bu vəsait isə çox cüzidir”.
Həmsöhbətimizin dediyinə görə, Azərbaycan tərəfi "Rubej” qrupunu azca da olsa maliyyələşdirsə, axtarışlar bərpa edilsə, həmyerlilərimizin cəsədlərinin qalıqlarını tapmaq mümkün olacaq”.
Bu arada bir məqamı da qeyd edək. "Rubej” tərəfindən vaxtı ilə döyüşlər gedən ərazidə həlak olmuş azərbaycanlıların konkret siyahısı da müəyyən edilib Onların sayı 23-dür. Aşağıda həmin siyahını yayımlayırıq.
