"Bu ilin yanvar ayında xarici ölkə vətəndaşları Türkiyədən 1462 mənzil alıb. Türkiyədən ev alan əcnəbilər arasında Azərbaycan vətəndaşları 6-cı yerdədir”.
Bu barədə Türkiyə Statistika Müəssisəsi xəbər yayıb. Məlumata görə, bu, 2015-ci ilin yanvar ayı ilə müqayisədə 13 faiz çoxdur. Xəbərdə o da qeyd olunur ki, Türkiyədə ev alan əcnəbilər arasında İraq, Səudiyyə Ərəbistanı, Küveyt, Rusiya, Əfqanıstan, Azərbaycan, Almaniya və İngiltərə vətəndaşları üstünlük təşkil edib. Belə ki, İraq vətəndaşları Türkiyədən 308, Səudiyyə Ərəbistanı vətəndaşları 136, Küveyt vətəndaşları 134, Rusiya vətəndaşları 106, Əfqanıstan vətəndaşları 104, Azərbaycan vətəndaşları 54, Almaniya vətəndaşları 49 və İngiltərə vətəndaşları 49 mənzil alıb. Əcnəbilər İstanbul, Antalya, Bursa, Yalova, Ankara, Aydın, Trabzon şəhərlərində ev almağa maraq göstəriblər. Türkiyədə əcnəbilərə mənzil satışı artsa da, ölkə daxilində satış bir ildə 1,9 faiz azalaraq 84 556 mənzil təşkil edib.
İqtisadçı-ekspert Natiq Cəfərli "Şərq”ə bildirib ki, Azərbaycan vətəndaşlarının daha çox Türkiyədən mənzil almasının bir neçə səbəbi var: "Birincisi odur ki, Azərbaycanda daşınmaz əmlak kifayət qədər yüksək qiymətə satılır. Ölkəmizdə satılan evin puluna Türkiyənin İstanbul şəhəri olmasa da, Bursa və İzmir kimi şəhərlərindən iki ev almaq mümkündür. Əlbəttə, vətəndaşlarımızın Türkiyəni seçmə səbəblərindən biri də qiymət məsələsidir. İkinci səbəb isə odur ki, manatın devalvasiyalarından sonra Azərbaycan vətəndaşları öz yığdıqları vəsaiti qorumağı düşünürlər. Çünki ölkəmizin bank sistemində müəyyən problemlər yaşanır. Bir neçə bank bağlanır və bəzi banklar depozitləri geri qaytarmaqda çətinlik çəkir. Bu, rəsmi şəkildə də etiraf olunur. Hətta dünən əmanətlərin sığortalanması fondu açıqlama verdi ki, bağlanan bankların əmanətləri qaytarmaq imkanı yoxdur”.
Ekspert diqqətə çatdırıb ki, ölkəmizdə manata olan güvənin zəifləməsi, daşınmaz əmlakın baha olması vətəndaşlarımızın Türkiyə bazarlarını seçməsinə səbəb olub: "Türkiyə bazarı spesifik bazardı və dünyada az saylı bazarlardandır ki, qoyulan əmanətlərin qiyməti hər il aşağısı 4-5 faiz qalxır. Yəni ora qoyulan yatırım dəyər itirmir, qazanır. Buna görə də, Azərbaycan vətəndaşları Türkiyəni seçməsinə maraqlı oldular və yatırımlarını ora etdilər. Bu, gələcəyə qoyulmuş yatırımdır. Bəziləri aldıqları evləri sonradan kirayə verərək bundan qazanc əldə edirlər. Əlbəttə, bu da Türkiyə bazarının canlanmasına səbəb olur. Həmyerlilərimiz bu bazarda çox aktivdirlər”.
Ayyət Əhməd
