ABŞ-ın "Mercer” konsaltinq şirkəti ənənəvi olaraq dünyanın ən bahalı şəhərlərinin renkinqini tərtib edib. 22-ci dəfə tərtib olunan renkinqdə 209 iri şəhərin adı var. Renkinqin tərtib olunmasında əsas meyar kimi iri şəhərlərdə əcnəbilərin yaşayış xərcləri götürülüb. Beləliklə, siyahı xarici ölkələrə işləməyə gələnlər üçün daha aktualdır.
Renkinqə Honkonq liderlik edir. İkinci yerdə Anqolanın paytaxtı Luanda qərarlaşıb. Sürix və Sinqapur 3-cü və 4-cü yerləri bölüşdüyü halda, Tokio 11-ci pillədən 5-ə yüksəlib.
İlk onluğa Kinşasa (Konqo Demokratik Respublikasının paytaxtı), Şanxay, Cenevrə, Ncamena (Çadın paytaxtı) və Pekin daxil olub.
Bakı isə 172-ci yerdədir. Renkinqin müəllifləri bildirir ki, 2015-ci illə müqayisədə bu il Azərbaycanın paytaxtı 100 pillədən çox geriləyib. Belə çıxır ki, paytaxtımızda mənzillərin kirayə qiyməti həddən artıq enib.
Ən ucuz ölkələrin siyahısına gəlincə, sonuncu yerlərdə Bişkek (207), Keyptaun (208) və Vindhuk (209) qərarlaşıblar.
ABŞ-ın "Mercer” konsaltinq şirkətinin renkinqini dəyərləndirən "Əmlak Bazarı İştirakçıları” İctimai Birliyinin sədri Ramil Osmanlı da Bakının ucuz şəhərlər arasında olmadığını düşünür: "Onların Azərbaycanda hansı şirkətlə əməkdaşlıq elədiklərini, bu nəticələri haradan əldə etdiklərini deyə bilmərəm. Konkret meyarları barəsində də xəbərsizəm. Amma onu deyə bilərəm ki, ötənilki qiymətlərlə müqayisədə mənzillərin kirayə qiymətlərində müəyyən azalmaların olduğu müşahidə edilir. Lakin bu ucuzlaşmanı bütün istehlak bazarlarına aid etmək olmaz”.
R.Osmanlının sözlərinə görə, beynəlxalq təşkilatlar, şirkətlər bu cür hesabatlar hazırlayan zaman rəsmi statistikaya və nəzəri rəqəmlərə istinad edirlər. Ona görə də, bir çox hallarda beynəlxalq göstəricilərlə yerli hesabatlar üst-üstə düşmür.
Bakının dünyanın varlı və ya ucuz şəhərləri siyahısında yer almasına gəldikdə isə ekspert Bakının daşınmaz əmlakın baha olduğu şəhərlər sırasında olduğunu deyib: "Ən azı MDB ölkələri arasında paytaxtımız ilk beşlikdədir. Avropanın, xüsusilə, Şərqi Avropanın paytaxt şəhərləri ilə müqayisədə Bakıda daşınmaz əmlak qiymətləri daha yüksəkdir. Digər istehlak sahələrinin qiyməti ilə bağlı bazarda durumun necə olduğunu isə dəqiq deyə bilmərəm”.
Şəymən
