"Bağlanan banklarda qorunan əmanətlərlə bağlı kompensasiya rəqəmlərinin obyektiv olmadığını düşünürəm”.
Bunu Sherg.az-a bağlanan banklarda qorunan əmanətlərlə bağlı təxminən 25 min nəfərə 725 milyon manatdan artıq kompensasiya ödənilməsinə münasibət bildirərkən iqtisadçı-ekspert Nazim Bəydəmirli deyib.
O bildirib ki, kompensasiyalar sığorta hesabına, başqa sözlə desək, kommersiya banklarının özlərinin vəsaitlərindən ödənilibsə, buna normal münasibət bəsləmək olardı:
"Ancaq mətbuat vasitəsilə çatan məlumatlar ondan ibarətdir ki, Bank Standart, Texnika Bank və digərlərinin əmanətçilərinin vəsaitlərini qaytarmaq üçün Maliyyə Nazirliyi Mərkəzi Bankdan borc alıb. Bunlar faktiki olaraq, dövlət vəsaiti hesabına ödənilib. Kommersiya banklarının üzvlük haqqı, ora yığılan vəsaitlər hesabına ödənilməyib.140 min nəfərədək əmanətçi gəlib əmanətlərini geri götürməməsinə gəldikdə isə bunlar çox kiçik məbləğlərdir. Əmanətçilərin əmanətlərini götürdüyü vaxtda onların hesabında qalmış qəpiklərə uyğun yuvarlaq hesablanmış 1 manat olub. Bu ondan qaynaqlanır. Təəssüf edirəm ki, rəqəmlərlə bu şəkildə manipulyasiya etmək çox qurumların istifadə etdiyi metodlardan biridir. Ona görə də, daha çox dollarla olan əmanətlər nə qədər olduğu açıqlanmalıdır. Bu vəsaitlər üzrə ən böyük ortalama məbləğ hansı məbləğ olub və kimlərə, hansı fiziki şəxslərə ödənilib”.
N. Bəydəmirli deyib ki, qərarların verilməsinə təsiri ola biləcək adamların öz vəsaitlərini çıxarda bilməsi haqqında fikir yürütmək olar. Əvvəllər 30 minə qədər məbləğ təşkil edən əmanətlər qorunurdu, onlar götürüldü:
"Bağlanan bankların əksəriyyətində qorunan əmanətlərin 35-40 faizi geri qaytarılmayıb. Ona görə, az əmanətləri olan insanlar təşviş içərisindədir. Standart Bankla olan məsələ, 1 gün ərzində bankın bankrot hesab olunması da şübhəli məqamlardan idi”.
Qeyd edək ki, Maliyyə Bazarlarına Nəzarət Palatasının Direktorlar Şurasının sədri Rüfət Aslanlı bu gün 140 min nəfərədək əmanətçinin əmanətlərini geri götürmədiyini deyib. O bildirib ki, bağlanan 11 bankda qorunan əmanətlər üzrə bu gün nəzərdə tutulmuş 760 milyon manatdan 725 milyon manatdan artıq kompensasiya ödənilib. Bu rəqəm təxminən 25 min nəfər təşkil edir.
