Azərbaycanda Ramazan ayı münasibəti ilə qılınacaq bayram namazının vaxtı açıqlanıb. Qafqaz Müsəlmanları İdarəsindən bildirilib ki, bayram namazı İdarənin əhatə etdiyi bütün ölkələrdə iyulun 6-da səhər saat 09:00-da qılınacaq. QMİ sədri Şeyxülislam Hacı Allahşükür Paşazadə həmin gün Bakıdakı Təzə Pir məscidində bayram namazına qatılacaq.
Qafqaz Müsəlmanları İdarəsinin Qazılar Şurası və Elmi-Dini Şurası builki Ramazan ayı ilə bağlı fətvasında müsəlmanlar üçün bu müqəddəs ayın 1-i ayın görünməsi ilə miladi təqvimlə 7 iyun 2016-cı ilə təsadüf etdiyi, Fitr - Ramazan bayramının - Şəvval ayının 1-nin isə Ayın üfüqi ərazimizdə görünməsinə istinadən iyul ayının 6-na təsadüf etdiyini qeyd edib.
Ramazan bayramının vaxtının açıqlanması həm də fitrə zəkatı verilməsi tarixini müəyyənləşdirmiş olur. Ramazan ayının sonuna yetişən şəxsin fitrə zəkatı ödəməsi vacibdir. Fitrə zəkatı isə Ramazanın sonuncu gününün şam namazı vaxtından sonra, bayram namazından öncə ödənməlidir.
Fitrə zəkatının miqdarı və kimlərə verilməsi həmişə suallar doğurur. QMİ-nin səlahiyyətli nümayəndəsi, "Məşədi Dadaş” məscidinin imam-camaatı, ilahiyyatçı Hacı Şahin Həsənli məsələyə aydınlıq gətirib.
Ş.Həsənli bildirib ki, Qafqaz Müsəlmanları İdarəsinin verdiyi açıqlamalara görə, bayram namazları müxtəlif məscidlərdə saat 08:00 və 09:00-da qılınacaq. Belə olduğu təqdirdə dinimizin hökmünə əsasən, iyulun 5-i axşamdan etibarən bayram namazına qədər fitrə zəkatı çıxarılmalıdır. Fitrə zəkatı yerli xüsusiyyətlər nəzərə alınmaqla, ən çox istifadə olunan ərzaq
məhsullarının 3 kiloqramının dəyəri miqdarında hesablanır. Adi qaydada 3 kiloqram çörəyin dəyəri götürülür. İmkanı çatan, maddi vəziyyəti yaxşı olanlar 3 kiloqram düyü, kişmiş, xurmanın dəyərini də götürə bilər. QMİ fitrə zəkatının miqdarını 10-15 manat müəyyən edib. Bazarda mövcud qiymətlərə baxıb daha aşağı məbləğ müəyyən etmək olar. Rəqəmin hesablanması insanların öz ixtiyarındadır.
Ailəsinin bir illik ehtiyacını ödəyə bilən fitrə zəkatı çıxarmalıdır. İmkanı aşağı olanlar büdcəsinə uyğun zəkat verə bilər.
Gündəlik ehtiyaclarını təmin edə bilməyən insanlar isə fitrə zəkatından azaddırlar. Daha yaxşı olar ki, fitrə zəkatı qohumda, qonşuda imkansız, yoxsul insanlara verilsin.
Məlahət
