SOCAR-da fəhlə kadrlarının hazırlanması üzrə növbəti buraxılış imtahanı keçirilib.
Şirkətin Təlim, Tədris və Sertifikatlaşdırma İdarəsinin (TTSİ) Qobustan Regional Təlim Mərkəzində fəhlə kadrlarının hazırlanması üzrə 10 aylıq kurs keçən 76 şagirdin iştirakı ilə növbəti buraxılış imtahanı keçirilib. Neftçilərin Hüquqlarının Müdafiə Komitəsinin sədri Mirvari Qəhrəmanlı "Şərq”ə açıqlamasında SOCAR-ın TTSİ-nin verdiyi sertifikatların mühüm əhəmiyyət kəsb etmədiyini deyib. Onun sözlərinə görə, bu sertifikatlar o qədər lazımsızdır ki, digər şirkətlər tərəfindən qəbul belə olunmur. Ancaq SOCAR digər şirkətlərin sertifikatını alan fəhlələri işə qəbul edirlər. Təbii ki, ortada ödənişli və ödənişsiz məsələsi də var:
"Hansısa xarici şirkətin aldığı sertifikat iş təcrübəsi kimi qəbul olunur. Bu qurumun sertifikatlarını alan fəhlələrin işə qəbulu mütləq deyil. Onlar da digər şəxslər kimi müsabiqədə iştirak etməlidirlər və bütün şərtləri ödəməlidirlər.
Uzaq başı bir az üstünlük verirlər. Şəxsən mən Mirvari Qəhrəmanlı olaraq həmin Mərkəzin təşkil etdiyi kurslara heç bir əhəmiyyət vermirəm. Çünki orada təcrübəli və daha peşəkar mütəxəssislərin potensialından istifadə olunmur.
Həmin komandada qohumbazlıq aparıcı rol oynayır. Ən əsası isə bu sertifikatların beynəlxalq aləmdə tanınmaması ilə bağlıdır. BP-nin sertifikatları dünyanın bütün ölkələrində tanınır və onların treninqlərində iştirak edən insanlar heç vaxt işsiz qalmırlar. Təcrübəli şəxs kimi onların işinə daim ehtiyac duyulur. SOCAR-da ixtisara düşən fəhlələri isə əllərində sertifikat olmasına rəğmən digər şirkətlər təcrübəli işçi kimi qiymətləndirmir. QHT-çi kimi mənim aldığım sertifikatlarla onların sertifikatlarının heç bir fərqi yoxdur”.
Şəymən
