Xəbər verdiyimiz kimi, 2018-ci ilin 31 dekabr tarixində Prezident İlham Əliyev Dünya Azərbaycanlılarının Həmrəylik Günü və Yeni il münasibətilə Azərbaycan xalqını təbrik edib. Təbrik çıxışında müxtəlif məqamlara toxunan ölkə başçısı bildirib ki, Azərbaycanın güclü hərbi potensialı münaqişənin həlli üçün əsas amildir:
"Biz son illər ərzində öz hərbi qüdrətimizi böyük dərəcədə artıra bilmişik. Bu gün Azərbaycan Ordusu dünya miqyasında güclü ordular sırasındadır.
Bu il ölkəmizdə iki dəfə keçirilmiş hərbi parad bizim gücümüzü, bizim güclü ordumuzun potensialını göstərir. Ən müasir silahlarla, texnika ilə təchiz edilmiş Azərbaycan Ordusu çox yüksək döyüş qabiliyyətinə malikdir və biz bu il bunu bir daha təsdiq etdik. Azərbaycan Ordusu Azərbaycan-Ermənistan sərhədinin Naxçıvan istiqamətində uğurlu əməliyyat keçirərək 11 min hektar torpağa tam nəzarət edir. Strateji yüksəkliklərin əldə edilməsi bizə imkan verir ki, Ermənistan ərazisindən keçən önəmli kommunikasiyalara və yollara tam nəzarət edək.
Biz bundan sonra da öz hərbi qüdrətimizi artıracağıq. Biz Ermənistan-Azərbaycan Dağlıq Qarabağ münaqişəsini sülh yolu ilə həll etmək istəyirik və danışıqlarda iştirakımız bunun əyani sübutudur. Ancaq hər kəs bilir və bilməlidir ki, münaqişənin həlli üçün hərbi amil xüsusi rol oynayır və bundan sonra da biz hərbi qüdrətimizi artıracağıq
Ölkə başçısının fikirlərini müsbət qiymətləndirən ehtiyatda olan polkovnik Şair Ramaldanov "Sherg.az”a deyib ki, Prezident İlham Əliyev həm də Azərbaycan Respublikasının Silahlı Qüvvələrinin Ali baş komandanı olaraq ordunun təkminləşdirilməsi, inkişafı ilə bağlı gedən işlərin rəhbəridir:
"Prezident silahlı qüvvələri hər zaman diqqət mərkəzində saxlayıb. Ölkə başçısı hər dəfə ordunu hazırlığını yüksək qiymətləndirib. Dövlət tərəfindən müntəzəm olaraq ordunun silahlandırılması ilə bağlı lazım olan tədbirlər görülür. Hətta ölkə başçısı Belarus səfərində memarandum imzalayıb. Ən yeni müdafiə sisteminin tətbiqi və müasir silahla ordunun təkminləşdirilməsi sahəsində işlər aparılıb. Ötənlərdə 100 illik paradda Azəbaycan ordusunun nəyə qadir olduğunu bütün dünyaya nümayiş etdirdi. Ordumuzun müasir hərbi texnikası düşmən və işğalçı ölkəyə göz dağı oldu. Dağlıq Qarabağ münaqişəsinin həll edilməsi və Azərbaycanın ərazi bütövlüyünün bərpası üçün ordumuz əsas rol oynayır. Çünki münaqişə sülh yolu ilə həll olunmasa, ordumuz qarşısına qoyulan tapşırığı yerinə yetirəcək. Əgər Ermənistan və Azərbaycanı təkbətək qoysalar, Azərbaycan Silahlı Qüvvələri işğalçı ölkənin ordusunu qısa müddətdə darmadağın edib, öz ərazi bütövlüyünü bərpa etməyə qadirdir".
Ş.Ramaldanov onu da diqqətə çatdırıb ki, ən nüfuzlu beynəlxalq qurumların verdiyi statistik məlumatlara görə, ordumuz 136 ölkənin ordusu sırasında 53-cü yerdə qərarlaşıb:
" Təbii ki, bütün bu müsbət göstəricilər Prezident İlham Əliyevin orduya göstərdiyi diqqətdən irəli gəlir. Gələcəkdə də Azərbaycan Silahlı Qüvvələri ən müasir silahlarla təchiz ediləcək".
Kənan Eynuroğlu
