"Azərbaycanda neft hasilatının azalması prosesi 2010-cu ildən gedir”.
Bu barədə "Sherg.az”a Neft Araşdırmaları Fondunun prezidenti İlham Şaban bildirib. O qeyd edib ki, Dövlət Statistika Komitəsinin məlumatlarına baxsaq, neft hasilatının azalması ilə bağlı təəccüb doğuracaq heç nə yoxdur:
"Bu proses obyektiv səbəblər üzündən baş verir. Ölkədə müstəqillik illərində ancaq bir blok neft yataqlarının işlənməsi baş verib. Bu illər ərzində bir dənə də neft yatağı kəşf edilməyib. Əvvəllər kəşf olunan neft yataqları isə bir növ çəlləkdir, istehsal etdikcə azalır. İctimaiyyətə neft hasilatının azalması səbəbləri bu cür çatdırılmalıdır. Bu proses normaldır.
Ümumiyyətlə, hasilat ildən-ilə azalmağa doğru gedir. Azərbaycanda neft hasilatı bitənə qədər bu proses davam edəcək”.
Qeyd edək ki, 2017-ci ilin yanvar-oktyabr aylarında ölkədə 32 mlrd. manatlıq sənaye məhsulu istehsal edilib.
Dövlət Statistika Komitəsinin məlumatına görə, sənayenin qeyri-neft sektorunda məhsul istehsalı 3,4 faiz artıb, neft sektorunda isə 5,9 faiz azalıb.
Sənaye məhsulunun 70 faizi mədənçıxarma sektorunda, 24,8 faizi emal sektorunda, 4,4 faizi elektrik enerjisi, qaz və buxar istehsalı, bölüşdürülməsi və təchizatı sektorunda, 0,8 faizi isə su təchizatı, tullantıların təmizlənməsi və emalı sektorunda istehsal olunub.
Aysel Aslan
