İstanbulun "Atatürk” Hava Limanındakı teraktın təşkilatçısı çeçen əsilli Əhməd Çatayev Saakaşvilinin hakimiyyəti dövründə Gürcüstan xüsusi xidmət orqanlarının agenti olub. Bunu Gürcüstan parlamentinin Müdafiə və milli təhlükəsizlik komitəsinin sədri İrakli Sesiaşvili deyib. Onun sözlərinə görə, Çatayev agent kimi Gürcüstanın operativ pasportunu daşıyıb:
"Məhz həmin pasportla müxəlif ölkələrə gedərək orada xüsusi tapşırıqları icra edib və buna görə maaş alıb”. Xatırladaq ki, Odessanın qubernatoru Saakaşvili İstanbul terrorunda Gürcüstan hökumətini ittiham edib. Eks-prezident Bidzina İvanişvili hakimiyyətini cinayətkar Çatayevi həbsdən buraxmaqda suçlayıb. İddia barədə "Şərq”ə danışan təhükəsizlik orqanlarının sabiq əməkdaşı, siyasi ekspert Arzu Nağıyev deyib ki, Çatayevin hansı ölkənin kəşfiyyat xidmətinə qulluq etdiyini dəqiq söyləmək mümkün deyil. Çünki "yaxşı mütəxəssis” kimi tanınan çeçen terrorçu istənilən xarici dövlətin kəşfiyyat orqanlarında, yaxud terror təşkilatlarında maraq oyada bilər: "Çatayevin "bacarığını” öyrənən kəşfiyyat xidmətləri və ya terror qruplaşmaları müəyyən pul müqabilində ondan istifadə edə bilərlər. Yəni xüsusi xidmət orqanları ilə onun əməkdaşlığı şəxsi müstəvidə də mümkündür. Ancaq Çatayevin həqiqətən gürcü agenti olması və öz xidmətini könüllü şəkildə digər kəşfiyyat orqanlarına təqdim etməsi sual doğuran məsələlərdir. Çatayev Avstriya vətəndaşlığını qəbul edib və orada siyasi sığınacaq alıb. Düşünürəm ki, bəzi dairələr onun gürcü agenti olmasını şişirdərək Türkiyə-Gürcüstan əlaqələrinə ziyan vurmağa çalışır. Kim olmasından asılı olmayaraq, Çatayev terrorçudur, İŞİD üzvüdür və eyni zamanda Rusiyadan getmiş qaçqındır. Milliyətcə çeçen olan Çatayev Gürcüstanda yox, Rusiyada yaşayıb. Ona görə də məsələni daha dəqiq araşdırmaq lazımdır”.
İsmayıl
