Azərbaycan Çinin Qansu əyalətindən kartof və zeytun yağı idxal edəcək. Bu barədə Qansu əyalətinin inzibatı mərkəzi Lançjou şəhərində keçirilən Beynəlxalq Qida Əməkdaşlığı Forumunda razılıq əldə olunub.
Azərbaycanın Çindən kartof və zeytun yağı idxal etməsi bir çox ekspertlərin narazılığına səbəb olub. Sosial şəbəkədə məsələni müzakirə edən istifadəçilər də hesab edir ki, bu, Azərbaycanda kartofçuluğu məhv etmək məqsədi güdür.
İqtisadi Sosial Inkişaf Mərkəzinin (İSİM) rəhbəri Vüqar Bayramov isə Azərbaycanın Çindən aqrar məhsullar idxal etməsinin arzuolunan olmadığını deyib. Onun sözlərinə görə, kənd təsərrüfatı ölkəsi olan Azərbaycan üçün aqrar sektorun qorunması, tələbin yerli məhsul hesabına ödənilməsi daha vacibdir, nəinki həmin məhsulların başqa ölkələrdən idxal edilməsi: "Cari mövsümdə fermerlərin daha çox kartof, soğan və digər məhsullar istehsal etməsi, əvvəlki illərlə müqayisədə onların qiymətinin xeyli dərəcədə ucuzlaşmasına gətirib çıxardıb.
Biz optimal qiymətlərin tərəfdarıyıq. Qiymətlər həm istehlakçı, həm də fermer üçün uyğun olmalıdır. İstehlakçı üçün əlavə xərc yaratmamalı, fermerlər üçünsə növbəti illərdə fəaliyyətlərini genişləndirməyə imkanlar qazandırmalıdır”.
Ötən illərlə müqayisədə bu il Azərbaycanda kartof istehsalında müəyyən artım müşahidə edildiyini vurğulayan ekspert hesab edir ki, Azərbaycan Çindən, eləcə də başqa ölkələrdən kartof idxal edərsə, nəticədə bu, ölkədə istehsal olunan eyni adda məhsulların satışında xeyli problem yarada bilər:
"Bazara daha ucuz kartofun çıxması, yerli məhsulların satılması ilə bağlı çətinlik yaradacaq. Təbii ki, bu da fermerlər üçün arzuolunan deyil. Nəzərə alaq ki, Azərbaycan aqrar məhsulları yerli istehsal hesabına ödəməyə çalışır. Xüsusən daxili bazarın qorunmasına daha ciddi ehtiyacın olduğu bir məqamda, fermerlərin dəstəklənməsinin aktuallaşdığı bir dövrdə digər ölkələrdən kütləvi şəkildə ucuz qiymətə kartofun idxal edilməsi ürəkaçan deyil”.
Şəymən
