Paytaxtda "Daqestan” marketlər şəbəkəsi fəaliyyətə başlayır. Bu barədə Dağıstanın Azərbaycandakı nümayəndəliyindən məlumat verilib. Məlumata görə, bu marketlərdə Dağıstan və Rusiya istehsalı olan məhsullar satılacaq.
O da bildirilir ki, "Daqestan” ticarət evi Dağıstan Prezidenti Ramazan Abdulatipovun tapşırığı ilə açılır. İlk marketin bu gün - sentyabrın 9-da Atatürk prospekti, 31 ünvanında açılması gözlənilir.
Marketlər şəbəkəsi Bakının rayonları və Azərbaycanın regionlarında genişlənməyi nəzərdə tutur. Bildirilir ki, paytaxtda və regionlarda bir neçə "Daqestan” ("Dağıstan”) marketləri açılacaq.
Qiymətlərə gəlincə, məhsulların satışı Rusiyadakı qiymətlərə uyğun həyata keçiriləcək.
Marketlərdə Azərbaycan vətəndaşlarının çalışacağı da qeyd olunur.
İqtisadçı Samir İsmayıl isə bu fikirdədir ki, Dağıstanın timsalında Rusiyanın Azərbaycan bazarında ucuzluq mühiti yaradacağı inandırıcı deyil:
- Birincisi, bu məlumatda "Daqestan” Ticarət Evinin Dağıstan Prezidenti Ramazan Abdulatipovun tapşırığı ilə yaradılmasının qeyd edilməsi azad sahibkarlığa zidd, azad bazar münasibətlərinə heç cür uyğun gəlməyən ifadədir. İkincisi, hazırda Rusiya Qərbin sanksiyaları altındadır. Belə vəziyyətdə Rusiya ərzaq sənayesi bizim bazara nə çıxara bilər? Rusiya özü bizdən kənd təsərrüfatı məhsulları gözləyən bir ölkədir. Rusiya ucuzluq hökm sürən bir ölkə də deyil. Çünki iqtisadi sanksiyalarla üzləşib. İnanmıram ki, belə vəziyyətdə Rusiya Azərbaycan bazarını geniş çeşiddə məhsullarla təmin edə bilsin. Marketlər elə bir ticarət şəbəkəsidir ki, burada ən azı 1000 çeşiddə mal və məhsul olmalıdır. Hardandır Rusiya sənayesinin bu qədər çeşid məhsulu?! Bəlkə yağ ixrac edə bilərlər. Çünki Rusiyanın daxili istehsalında yağ var. Rusiyanın məşhur kolbasa, sosis - ət məhsulları, ucuz ola bilər, amma nəzərə alaq ki, bunu da Rusiya özü Pribaltikadan idxal edir. Bəlkə Dağıstan coğrafi bölgə kimi Azərbaycana yaxınlığı baxımından ixracda sərfəli ola bilər. Amma bütün amillər nəzərə alınmaqla mən hətta Dağıstandan idxal ediləcək məhsulların da daxildə ucuzluq yarada biləcəyini zənn etmirəm. Biz kimdənsə kömək gözləməməliyik. Azərbaycan özü aqrar ölkədir. Biz öz daxili resurslarımız hesabına kənd təsərrüfatını da, ərzaq sənayemizi də inkişaf etdirməliyik.
S.İsmayıl "Dağıstan” marketlər şəbəkəsi açılması və orada ucuzluq olacağı barədə yayılan məlumatların piar xarakteri daşıdığına da diqqət çəkdi:
- Belə xəbərlər bəzən piar xarakterli də olur. Yeni market açılır, belə məlumatları yaymaqla alıcı cəlb etməyə çalışırlar. Bir müddət keçdikdən sonra vəziyyət onsuz da bəlli olacaq. Marketlərdə nə satılacaq, necə satılacaq, qiymətlər necə olacaq, onsuz da görəcəyik.
