“Küçə iti quduzlaşıbsa, bunun məsuliyyəti konkret idarələrindir. Onlar vaxtlı-vaxtında peyvənd edilməlidir, sterilizasiya tədbirləri aparılmalıdır”
Paytaxtda, eləcə də ətraf bölgələr və regionlarda sahibsiz heyvanların, xüsusilə də küçə itlərin çoxalması əlaqədar qurumları hərəkətə gətirib. Son zamanlar əhalinin, azyaşlıların küçə itlərinin hücumuna məruz qalmaları problemin qısa zamanda həllini vacib edir.
Verilən məlumatlara görə, yaxın zamanda Azərbaycanda sahibsiz heyvanların sağlamlığına nəzarət mexanizmi yaradılacaq. Bildirilir ki, bu, "Azərbaycan Respublikasında qida təhlükəsizliyinin təmin edilməsinə dair 2019–2025-ci illər üçün Dövlət Proqramı”nda əksini tapıb. Proqramda qeyd olunub ki, Qida Təhlükəsizliyi Agentliyi ilə yanaşı, Kənd Təsərrüfatı Nazirliyi, yerli icra hakimiyyəti orqanları, qeyri-hökumət təşkilatları nəzarət mexanizmi yaratma prosesini 2020-ci ilə qədər həyata keçirəcək.
Mütəxəssislər də bu fikirdədir ki, sahibsiz heyvanların sayının artması və onlara zəruri qayğının göstərilməməsi, xüsusi ilə küçə itləri və pişiklərin vaxtında sterilizasiya edilməməsi, habelə peyvəndlənməməsi ölkədə bir çox ekoloji, sanitar və səhiyyə problemlərinin yaranması ilə nəticələnir. Eyni zamanda, küçədə yaşayan it və pişiklərin populyasiyasının nəzarətsiz artımı onların özünün rifahına mənfi təsir göstərir, o cümlədən yem və sığınacaq tapması və sağlamlığını əngəlləyir.
Problemin həll edilməsi üçün onun simptomlarının - sterilizasiya, peyvəndləmə, baytar qayğısı, sahibləndirmə, sığınacaq və s. öhdəsindən gəlməklə yanaşı, məsələnin kökündə duran insan amilinin aradan qaldırılmasını da tələb edir.
Evsiz Heyvanlaırn Müdafiəsi İctimai Birliyinin rəhbəri Leyla Əlizadə "Sherg.az"a bildirib ki, ev heyvanına sahib olan şəxs bunun məsuliyyətini də anlamalıdır:
- Təəssüf ki, bəzi insanlar ev heyvanlarını dəb xətrinə, kiminsə qarşısında öyünmək məqsədilə əldə edir. Amma bir müddət keçdikdən sonra heyvanları baxımsız saxlayır, qidalandırmır, günlərlə, bəzən aylarla səfərlərə çıxır, heyvanları nəzarətsiz qoyurlar və sonra da küçəyə atırlar. Heyvanlar da təbiətin bir parçasıdır. Küçə iti quduzlaşıbsa, bunun məsuliyyəti konkret idarələrindir. Küçə itləri vaxtlı-vaxtında peyvənd edilməlidir, sterilizasiya tədbirləri aparılmalıdır. Küçə heyvanlarının zibilliklərdə yem axtarmasının qarşısı alınmalıdır.
Antisanitar şəraitdə əlbəttə, it quduzluq tapar. Küçə heyvanları xüsusi idarə tərəfindən tutulmalı, peyvəndlənməli, sterilizasiya işi aparılmalı, lazımdırsa axtalanmalıdır, qısırlaşdırılmalıdır, sonra yenidən təbiətə buraxılmalıdır. Bəzən qulaqlarında «birka» olan itlər görürük. Bu o deməkdir ki, bu it artıq təhlükə daşımır. Bu işlər görülərsə, sahibsiz itlər getdikcə çoxalmaz, ətrafdakı insanlara da zərər vurmazlar. Çox istərdim ki, insanlarımız hansısa ev heyvanına sahiblənib, sonra onu küçəyə atmasınlar. Biz bacardığımız qədər çalışırıq, belə heyvanlara yeni sahiblər tapaq. Bizimlə könüllü qruplar çalışır və məlumatlar əldə edirlər. Bacardığımız köməyi göstərməyə çalışırıq.
Məlahət Rzayeva
