Dəli Domrulun quru çay üzərində körpü saldıraraq keçənlərdən otuz üç axça, keçmək istəməyəndən qırx axça haqq yığması "Kitabi Dədə Qorqud” dastanının ən yadda qalan
hissələrindən biri hesab olunur. Bu da öz dövrü üçün Dəli Domrulun hamıdan cəsur, güclü olmasına işarə idi.
Bəs görəsən, Bakı Beynəlxalq Avtovağzal Kompleksinin ərazisinə daxil olan avtomobillərdən ödəniş haqqı tələb olunması nəyin göstəricisidir? Bütün taksi sürücüləri və fərdi avtomobil sahibləri avtovağzal ərazisinə daxil olmaq üçün 1 manat ödəniş etməyə məcburdular. Bu ödəniş haqqı yalnız sərnişin avtobuslarına şamil olunmur. Qeyd edək ki, avtovağzalın girişində nəzarət buraxılış məntəqəsi yaradılıb və üzərinə "giriş haqqı 1 manat” yazılan lövhəsi vurulub. Sürücülər bir çox hallarda bu vəziyyətin heç bir qanuni əsas olmadığını iddia edərək, ödənişdən imtina etsələr də, dərhal müqavimətlə qarşılanır və ərazini tərk etmək məcburiyyətində qalırlar. Ekspertlər isə hesab edir ki, sözügedən ödəniş qanun tələbi olmasa da, əksi ilə bağlı da bir qadağa yoxdur. Hətta bir çoxları hesab edir ki, avtovağzal ərazisində nəqliyyatın sıx olmaması üçün ödənişli olması məqsədəuyğundur. Amma bu rüsum 1 manat yox, 30-40 qəpik civarında olmalıdır.
Məsələ ilə bağlı münasibət bildirən hüquqşünas, ekspert Ərşad Hüseynovun sözlərinə görə, avtovağzal, hava limanı və digər obyektlərdə də bu cür pullu xidmətlər olur: "Bakı Beynəlxalq Avtovağzal Kompleksinin yerləşdiyi ərazi dövlət mülkiyyəti olsa da, pullu xidmət ola bilər. Lakin bu xidmətlərin qiymətini obyektlər özləri yox, dövlət müəyyən etməlidir. Qanunvericiliyimizdə həmin obyektlərdə dayanacağın ödənişli və ya ödənişsiz olması barədə dəqiq göstəriş yoxdur. Bu olmadığına görə xidmətin pullu edilməsində problem yoxdur. Çünki bu obyekt təsərrüfat hesablıdır, onların bəzi xərcləri də var. Bu xidməti dövlət müəyyən edərsə, belə problemlər olmayacaq. Yaxşı olar ki, Tarif Şurası belə obyektlərdə qiyməti müəyyən etsin. Xidmət haqqını Tarif Şurası müəyyən etməsə belə, müəyyən edilmiş qiymətlərlə bağlı sənəd olmalıdır. Həmin sənəd qurumun saytında, ya da xidmət göstərilən ərazidə yerləşdirilməlidir”.
Şəymən
