"Statistik baxımdan Azərbaycanda ana və uşaq ölümlərinin sayı o qədər də çox deyil”.
Bu sözləri "Sherg.az”a açıqlamasında Milli Məclisin Səhiyyə kimitəsinin sədr müavini, millət vəkili Musa Quliyev deyib.
Deputat bildirib ki, uşaq ölümləri yalnız tibbi yox, eyni zamanda sosial-ictimai və siyasi əhəmiyyətli bir məsələdir:
"Dövlətin inkişaf səviyyəsinin göstəricilərindən biri də məhz ana və uşaq ölümlərinin sayıdır. Son illər ölkəmizdə uşaq ölümləri aşağı həddə qalmaqda davam edir və orta Avropa göstəricilərinə yaxındır.
Təxminən 20 il bundan əvvəl Azərbaycanda ana və körpə ölümləri yüksək səviyyədə idi. Daha sonra müvafiq tədbirlər görüldü, qanun qəbul edildi və dövlət proqramı hazırlandı. Məlumdur ki, hər il dövlət büdcəsindən müəyyən vəsaitlər ayrılır.
Son illərdə bir neçə uşaq ölümü baş verib. Təbii ki, hər bir uşaq və ana ölümü Səhiyyə Nazirliyinin xüsusi komissiyası tərəfindən araşdırılmalı, daha sonra isə uyğun tədbirlər görülməlidir. Ola bilsin ki, baş verənlərdə həkim səhlənkarlığı yoxdur. Məsələn, uşaq ana bətnində ölü ola bilər, yaxud da müəyyən xəstəliklə doğular.
Hər halda ana və uşaq ölümü dəqiq araşdırılmalı, nəticə çıxarılmalı və tədbirlər görülməlidir. Ana və uşaq ölümləri bizim üçün ciddi siqnaldır. Fikrimcə, mətbuatın bu mövzunu gündəmdə saxlaması olduqca təqdirəlayiqdir”.
Qeyd edək ki, bir gündə 3 körpə ölümü baş verib. İmişli rayon sakini Mürsəlova Nurdan Telman qızı aprelin 20-də qeysəriyyə əməliyyatı olunub, doğulmuş qız övladının vəziyyəti ağırlaşdığından körpə ölüb. Növbəti hadisə Sabirabad rayonunda olub. 1982-ci il təvəllüdlü Nəbiyeva Günel Şəmşir qızı hamiləliklə əlaqədar Sabirabad Perinatal Mərkəzə daxil olub.
Qadının üzərində qeysəriyyə əməliyyatı aparılıb və əkiz uşaqlar ana bətnindən götürülüb. 31-32 həftəlik körpələr küvəzə yerləşdirilib. Üç gün sonra isə körpələr orada ölüb.
Yeganə Bayramova
