"Ölkə başçısının sosial siyasət sahəsində atdığı mühüm addımların çoxu Qarabağ əlilləri, şəhid ailələri və müavinət institutuna şamil olunur”.
Bu barədə "Sherg.az”a millət vəkili, Milli Məclisin Əmək və Sosial siyasət komitəsinin sədri Hadi Rəcəbli bildirib.
O xatırladıb ki, ötən ilin sonunda yaşayış minimumu 116 manatdan 130 manata yüksəldilib:
"Bütün bunların fonunda artımların daha çox şəhid ailələri, müharibə əlilləri və aztəminatlı ailələrə yönəldilməsini müsbət qiymətləndirmək lazımdır. Təxminən 600 milyon manat civarında vəsait ayrılıb, 3 milyon 500 mindən çox insanın təqaüd və maaşı artırılıb.
Fəxri adlara, titullara görə də ayrılan təqaüdlər yüksəldildi. Ölkə başçısı Qarabağ əlillərinə mənzil verilməsi ilə bağlı da addımlar atdı. İndiyə qədər Qarabağ əlilləri və şəhid ailələrinin təxminən 6 minə qədəri mənzillə təmin olunub. Bütün bunlar onu göstərir ki, həmin qrup insanlar üçün hər cür şərait yaradılır. Şəhid ailələri, müharibə əlilləri həm prezident təqaüdü, həm də dövlət müavinəti alırlar".
Qeyd edək ki, Prezident İlham Əliyev Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlil olmuş şəxslərin və şəhid ailələrinin sosial-məişət şəraitinin yaxşılaşdırılmasına dair əlavə tədbirlər haqqında sərəncam imzalayıb.
Sərəncama əsasən, Qarabağ müharibəsi əlilləri və şəhid ailələri üçün mənzillərin alınması məqsədi ilə Azərbaycan Respublikası Prezidentinin 2018-ci il 22 yanvar tarixli 3593 nömrəli Sərəncamı ilə təsdiq edilmiş "Azərbaycan Respublikasının 2018-ci il dövlət büdcəsində dövlət əsaslı vəsait qoyuluşu (investisiya xərcləri) üçün nəzərdə tutulan vəsaitin bölgüsü”nün 1.10.8-ci yarımbəndində göstərilmiş məbləğin 10 milyon manat Əmək və Əhalinin Sosial Müdafiəsi Nazirliyinə ayrılıb.
Aysel Aslan
