"Böyük Britaniyalı ekspertin Ermənistan və Azərbaycan orduları arasında bərabərlik işarəsi qoyması uğursuz cəhddir”.
Bunu "Sherg.az”a Londondakı LİNKS Araşdırmalar Mərkəzinin icraçı direktoru Denis Sammutun Dağlıq Qarabağ münaqişəsi ilə bağlı açıqlamalarını şərh edərkən millət vəkili Elman Nəsirov deyib. O bildirib ki, aprel döyüşləri Azərbaycan ordusunun gücünü ortaya qoydu:
"Hətta Azərbaycan aprel döyüşlərində ordusunun, hərbi gücünün cüzi hissəsini istifadə etdi. Ermənistanın isə acizliyi hiss olundu. Ölkə başçısının dediyi kimi, əgər Azərbaycan bütün hərbi potensialından istifadə etsəydi, Ermənistanda daş üstündə daş qalmazdı.
İki hal ola bilər: ya əcnəbi ekspertin bu məsələlərlə bağlı məlumatsızlığı var, ya da ki, ermənipərəst qüvvələr onun belə fikir söyləməsini istəyiblər.
Münaqişənin sülh yolu ilə həllinə gəldikdə isə bu, yeni ideya deyil. Azərbaycan ərazilərinin işğal altında olmasına baxmayaraq, müharibəyə başlamayıbsa, bu, dövlətimizin sülh prosesinə nə qədər sadiq qalmasının göstəricisidir. Azərbaycan münaqişənin dinc yolla, dəyirmi masa ətrafında həllini istəyir. Lakin qarşı tərəf illüziya yaratmamalıdır ki, Azərbaycan sona qədər sülhpərvər siyasətini davam etdirəcək.
Ermənistanın sona qədər işğalçılıq siyasətini davam etdirməsi, status-kvonu qoruyub saxlaması mümkün deyil. Belə düşüncə Ermənistanda hakimdirsə, deməli onlar səhv edir. Azərbaycan münaqişəni dinc yolla həllini istəsə də, hərbi yolla həll hüququnu da özündə saxlayır. BMT nizamnaməsinin 51-ci maddəsi var. Həmin maddədə yazılıb ki, təcavüzə məruz qalan dövlətin fərdi və kollektiv müdafiə hüququ mövcuddur.
Bütün bunları nəzərə alaraq, böyük britaniyalı ekspertin fikirlərində ziddiyyətli məqamlar olduğunu söyləməliyəm. Mütəxəssisin Ermənistan silahlı qüvvələrini şişirtməsi, Azərbaycanla eyniləşdirməsi kökündən yanlış yanaşmadır. Ermənistan eyni mənbədən – Rusiyadan silahlar alsa da, əksəriyyəti köhnəlmiş silahlardır. Azərbaycan isə digər ölkələrdən də ən müasir silahları alır. Tək sözdə deyil əməldə də - aprel döyüşlərində Azərbaycan bu həqiqəti isbatladı”.
Qeyd edək ki, D. Sammutun sözlərinə görə, hər iki tərəfdə olan silahlar böyük dağıdıcı gücə malikdir. Ekspert bildirib ki, sülh yolu ilə həll ilk növbədə münaqişədən birbaşa əziyyət çəkmiş insanların ehtiyaclarına uyğundur. Bu baxımdan qaçqın və məcburi köçkünlər öz evlərinə qayıtmalıdır.
Aysel Aslan
