Dünən parlamentdə Hesablama Palatasının 2014-cü il üzrə illik hesabatının dinlənilməsi keçirilib. Palatanın sədri Vüqar Gülməmmədov qeyd edib ki, hesabat ilində dövlət büdcəsi və büdcədənkənar həcmi, strukturu və təyinatı üzrə vaxtında icrasına nəzarəti həyata keçirmək, həmçinin dövlət büdcəsindən maliyyələşdirmələrin təsdiq olunan dövlət büdcəsində müəyyən edildiyi kimi aparılmasını təhlil etmək, aşkar edilən kənarlaşmaların aradan qaldırılması, eləcə də büdcə prosesinin təkmilləşdirilməsi haqqında təkliflər hazırlamaq məqsədilə ikisi analitik təhlil olmaqla 82 nəzarət tədbiri həyata keçirilib.
Onun sözlərinə görə, hesabat ilində aparılan nəzarət tədbirlərinin nəticələri barədə məlumatlar Milli Məclisə təqdim olunub, cinayət əlamətləri ehtimal olunan 4 tədbirin nəticələri üzrə müvafiq materiallar Respublika Baş Prokurorluğuna göndərilib. Hesabat ilində 5 təşkilatda palata tərəfindən ilk dəfə olaraq nəzarət tədbiri həyata keçirilib. Nəticələri haqda kollegiya qərarı qəbul
olunan 80 nəzarət tədbiri 126 qurumun fəaliyyətini əhatə edib. V.Gülməmmədov qeyd edib ki, 2014-cü ildə aparılan audit tədbirləri zamanı qanunun tələbləri gözlənilmədən 294 mln. manat vəsaitin satınalma proseduru keçirilmədən xərc olunduğu müəyyən edilib: "Hər bir nəzarət obyektində rast gəlinən ikinci nöqsan vəsaitlərin təyinatı üzrə istifadə olunmamasıdır. Bu kimi tədbirlərlə yanaşı, 323,5 ştat vahidinin və 11 qrupun ləğvi təmin olunub. Ümumilikdə, bu ştat vahidləri və qrupların ləğv edilməsi ilə orta hesabla il ərzində 1,9 mln. manat əlavə vəsaitin istifadəsinin qarşısı alınıb”.
Millət vəkilləri hesabatla bağlı fikirlərini bildirdikdən sonra, sənəd səsə qoyularaq qəbul edilib.
Anar
