Xarici işlər naziri Elmar Məmmədyarov Avropa İttifaqının Cənubi Qafqaz üzrə xüsusi nümayəndəsi Herbert Salberi qəbul edib. Nazirliyin mətbuat xidmətindən verilən məlumata görə, görüşdə Azərbaycanla Avropa İttifaqı arasında əlaqələrin hazırkı vəziyyəti və inkişaf perspektivlərinə dair fikir mübadiləsi aparılıb.
E.Məmmədyarov Dağlıq Qarabağ münaqişəsinin həlli üzrə ATƏT-in Minsk Qrupunun həmsədrlərinin vasitəçiliyi ilə aparılan danışıqlar prosesi haqqında məlumat verib, münaqişənin regional sülh və təhlükəsizlik üçün başlıca təhdid olduğunu diqqətə çatdırıb. Mövcud status-kvonun qeyri-davamlı və qəbuledilməz olduğunu deyən nazir əlavə edib ki, münaqişənin həlli üçün ilk növbədə Ermənistanın silahlı qüvvələri işğal olunmuş Azərbaycan ərazilərindən çıxarılmalıdır. Nazir Dağlıq Qarabağ bölgəsinin azərbaycanlı və erməni icmaları arasında təmas və dialoqun yaradılmasının vacibliyini də nəzərə çatdırıb.
İcmaların görüşməsi məsələsi ilə bağlı "Şərq”ə danışan Dağlıq Qarabağın Azərbaycanlı İcmasının rəhbəri Bayram Səfərov icmaların bir araya gələrək dialoq aparmasını hər zaman dəstəklədiyini deyib: "İcmaların görüşü üçün hər tərəfin razılığı, təşəbbüsü lazımdır. Ancaq məsələ burasındadır ki, Ermənistan rəhbəri erməni icmasına azadlıq, sərbəstlik vermir, onları təzyiq və qorxu altında saxlayır. Ona görə də erməni icması bizim istəməyimizə rəğmən görüşə müsbət yanaşmır. Azərbaycan isə düşmən Ermənistandan fərqli olaraq demokratik ölkədir. Bizim üçün xalq diplomatiyası və icmaların görüşü hər zaman önəmli, arzuolunan məsələdir. Buna hər vaxt hazırıq. Lakin təəssüflər olsun ki, işğalçı rejimdən demokratik addım gözləyə bilmərik”. Görüşlərin hansı formatda ola biləcəyindən danışan B.Səfərov bildirib ki, icmaların qarşılıqlı olaraq Azərbaycana və Ermənistana səfərlər etməsi qəbuledilməzdir: "Bu mümkün deyil. Düzdür, Azərbaycan xalqının tərbiyəsi də, səviyyəsi də imkan verir ki, erməni icması ölkəmizə gələrək toxunulmaz şəraitdə görüş keçirə bilsinlər. Amma Ermənistan hakimiyyəti və ictimaiyyəti tamamilə fərqli düşüncədədir. Ona görə də biz düşmən ölkəyə səfər edə bilmərik”. B.Səfərovun sözlərinə görə, Ermənistanda yaşayan adamların hamısı ölkədəki ağır durumdan beziblər: "Sadə ermənilərin hamısı azərbaycanlılarla dostluq münasibəti qurmaq və xoş həyat yaşamaq istəyirlər. Azərbaycanın bugünkü inkişafı, stabilliyi erməniləri valeh edir. Onlar bizə həsəd aparırlar. Xüsusən Dağlıq Qarabağın erməni icması bizimlə bir yerdə yaşamaq istəyirlər”. İcma rəhbəri Avropa İttifaqının nümayəndəsi Herbert Salberiylə görüşdüyünü də deyib: "Mən və deputat Elman Məmmədov Salberiylə bir araya gəldik və müzakirələr apardıq, fikirlər yürütdük. Ancaq danışıqlarımızı qəzetə vermək olmaz. Çünki ermənilər o dəqiqə maneçilik törədirlər”.
İsmayıl
